Хаёлий бир дунё қаърида қолдим
Эсимни таниган чоғимдан буён.
Жонимни қийнадим. Ўтларга солдим…
… Ёш эдим. Қаридим. Тинмайман ҳамон.
Мурувват кутмадим. Таваккал қилдим,
Келган балоларга урдим бошимни.
Ўзим ўз бағримни бешафқат тилдим-
Ҳечкимга кўрсатмай кўзда ёшимни…
Қараб туролмадим юртнинг ҳолига,
Дўстларим сафига урдим ўзимни.
Тақдирим отининг тўзғин ёлига-
Эрк бердим. Интилдим. Қўшдим қўримни…
Баъзан шаҳдимиздан дарёлар ёнди,
Баъзан юрт тўлғонди. Тўлғонди замон.
Эл- элга айланди. Қалқди. Уйғонди.
Гўё уфқ очилди. Очилди имкон…
Гоҳо ғолиб бўлдик, гоҳида мағлуб.
Ҳарқалай курашдик. Қайтмадик ахир…
Минг бора тирилдик. Минг бора ўлдик.
Демак- биз яшадик дегали арзир…
Аммо бир андиша қийнайди кўксим,
Ҳадикдан сесканиб кетаман баъзан…
Ёвузга айланиб қолмасам ўзим-
Курша- кураша ёвузлик билан…