2011 йил, 5 июль
Бугун 2011 йил, 5 июль, Очлик акциямизнинг тўққизинчи куни. Эрталаб таниқли ҳуқуқ ҳимоячиси Суҳроб Исмоилов қўнғироқ қилди. Соғлиғимиз кун сайин ёмонлашиб бораётган бўлса-да, ҳукумат бизнинг бу акциямизга лоқайдлик билан қарамоқда. Ҳукуматимизнинг фуқаролар тақдирига бефарқ, беэътиборлигини кенг оммага яна бир бор эслатиш ва билдириш мақсадида биз 7 июль куни мамлакатимиздаги дипломатик корпус ва халқаро ташкилотлар вакиллари, мустақил ҳуқуқ ҳимоячилари, мустақил журналистлар иштирокида матбуот анжумани ўтказиш мақсад килган эдик. Суҳроб Исмоилов мазкур матбуот анжуманини ташкил этиш борасиида бизга яқиндан кўмак беришини маълум қилди. Бугун матбуот анжумани учун баёнотимизнинг ўзбек тилидаги матнини тайёрладик.
Бугун, менинг, М. Эшонқулованинг ошқозони ва жигарида кун бўйи билинар-билинмас оғриқ турди. С. Амонова ошқозон оғриғидан ҳамон азобда. Ошқозонидаги дарди кун сайин кучайиб бормоқда. Соғлиғимизда бўлган бу каби салбий ўзгаришлар кечки соат 21.00 ларга бориб тез тиббий ёрдамга мурожаат қилишимизга сабаб бўлди. Орадан роппа-роса бир соату 10 дақиқа ўтгач кириб келган тез тиббий ёрдам шифокори Элнура Мадрейимова тиббий ходим ҳамроҳлигида кириб келди. Бизнинг бир тўшакда бўлиб, беҳол бўлиб ётганимизни кўрган Элнура Мадрейимова “Нима гап?! Касал ким?” дея хитоб қилди. Биз, дедик ёстиқдан бош кўтариб. Қаерингиз безовта қилаяпти?” чимирилди у. “Ошқозоним билан ўт халтам азоб бераяпти” жавоб қилди Амонова ғужанак бўлиб. “Нега оғрийди ошқозон?” сўради шифокор. “Биз очлик эълон қилганмиз. 9 кундирки сувдан бошқа туз тотмаганмиз, эҳтимол шунгадир?” деди Эшонқулова.
“Нега унда бизни чақирдинглар? Нима, биз сизларга овқат егизиб қўйишимиз керакми? Бу бизнинг ишимизга кирмайди! Бу милиса билан боғлиқ муаммо экан. Ҳозироқ “02”га қўнғироқ қиламан. Эрталабдан бери буюртмалардан чарчаб кетганман. Мен ҳам очман. Сизлар овқат емаган бўлсаларингиз, биз дўхтирларда нима гуноҳ! Нега бизни овора қилдинглар!” деб додлаб кетди. Унинг адоқсиз саволларига жавоб қилишга ҳолимиз йўқ эди. Шунинг учун М. Эшонқулованинг турмуш ўртоғи Аваз ака Фозилов кўмакка келди. Тез тиббий ётдам шифокорини муомала қилишга ундаб, инсофга чиқирди. Вазиятни тушунтириб бергач, Элнура Мадрейимова “Эй, ахмоқлар-ей, ҳаммани қўйиб президент сизларни қабул қиларканми? Ҳечамда. Тезда овқатланинглар. Йўқса, Каримовнинг атрофидаги одамлар сизларни бир кунда йўқ қилиб юборадики, ҳеч ким ҳеч қаердан топишолмайди. Шу керакми сизларга?” деб танбеҳ берди.
С. Амонованинг аҳволи оғирлиги туфайли уни шифохонага олиб кетишмоқчи эди, бироқ Элнура Мадрейимованинг қўполлиги қўнглига қаттиқ теккан Амонова “Ўлсам, шу ерда ўла қолай. Лекин қўпол шифокорларнинг миннатли кўмагини олмайман” деб туриб олди. Улар Саодатни касалхонага олиб кетиш учун кўндира олишмади.
Улар томонидан Саодатга ошқозон ва ўт пуфаги яллиғланиши хамда панкреатит хуружи ташҳиси қўйилди.
М. Эшонқулова борасида эса ички заҳарли бўқоқ таъсирида юракнинг тез уриши, титраш ва чап кўзнинг чақчайиш ҳолатлари кузатилмоқда, деган хулосага келишди.
Ҳуқуқ ҳимоячиси Надежда Атаева билан скайп орқали боғланиб, соғлиғимиз борасида қайғураётганлигини маълум қиларкан, бизларни очликни тўхтатишга чақирди.
Шунингдек, юртимиздаги мустақил ҳуқуқ ҳимоячилари, хориж матбуотида фаолият юритаётган ҳамкасбларимиз қўнғироқ қилиб, ҳол-аҳвол сўрашди.
Ниҳоят, очлик акциясининг тўққизинчи куни ҳам ниҳоясига етди.
Copyright © 2018 Birdamlik.Info