Гулҳаё Бобожонова.
Фарғона вилояти, Марғилон туманлараро фуқаролик ишлари бўйича суди тамонидан, кейинги вақтларда оилавий ишларни бирёқлама кўрилиши кузатилмоқда. Ишлар асосан эркаклар фойдасига хал қилиниб, аёллар ва болалар ҳуқуқлари бузилишлари содир бўлмоқда.
Мисол учун, Олимхон Қурбоновнинг турмуш ўртоғи Инобатхон Қурбоновага нисбатан ажралиш ҳақидаги даъво аризаси, қонунга зид равишда қаноатлантирилган. Оилада ёш вояга етмаган фарзанд бўлишига қарамай, ярашиш учун муддат белгиланмаган. Аёл боласи билан эрининг (отасининг номида бўлган) уйидан қиш мавсумида (17 феврал 2011 йил) мажбурий кўчириб, чиқариб юборилган. Сеп қилиб берилган, мебел жихозлар, суд ижрочилари тамонидан, қор-ёмғир остига олиб чиқиб ташланган ва хароб, яроқсиз ҳолатга келтирилган.
Бу ишнинг, ажабланарлиси шундаки, ажралиш хақидаги эрнинг аризасини кўрилишида, суд жавобгарни, яъни, И.Қурбоновани судга чақиртирмасдан, унинг иштирокисиз ишни кўриб, даъвогарнинг, яъни, эрининг фойдасига қарор чиқарган. Суд, ўртадаги боланинг тарбияси ва моддий таъминоти учун отасига алимент тўлаш белгилаган бўлсада, турли хийла-найранглар билан алимент тўлашдан у (ота) бўйин товлаб келмоқда.
Ўзаро турмуш даврида қурилган уй-жойлар эса, эрнинг отаси, яъни, кайнотанинг номига расмийлаштирилган бўлгани учун, аёл боласи билан уйдан хайдаб чиқарилган. Бу ишнинг яна бир қизиқ тамони шуки, И.Қурбонова хозир ўзининг отасиникида яшасада, паспортида турар жойи (пропискаси) қайд этилмаган. Яъни, турмушга чиққандан сўнг, отасининг уйидан пропискадан чиқарилган. Лекин эрининг уйига прописка қилинмасдан, ажраштирилиб юборилган. Натижада, И.Қурбонова хозир пропискасиз яшаб келмоқда. Бирор корхонага ишга жойлашиш учун имкони ҳам йўқ.
Бундай мисолларни яна кўплаб келтириш мумкин. Умид қиламизки, мутасаддиларимиз Марғилон туманлараро ишлари бўйича судидаги вазиятни, ижобий тамонга ўзгартиришга ҳарақат қиладилар.
***
Фарғона, “Бирдамлик” ХҲ