БЕПУШЛИК ҲАМ КАСАЛЛИКМИ?

Бепуштлик – касаллик эмас. У мутлақо соғлом эркак ва аёлларда ҳам учраши мумкин. Шундай бўлсада, бепуштликка дучор бўлган кишилар йиллар давомида сабот билан даволанадилар ва буни соғ-саломатликнинг нишонаси ҳам деб бўлмайди. Бошқача қилиб айтганда, бепуштлик касаллик ҳам, соғломлик ҳам эмас. Унинг ўзига хос томони шундаки, у битта одамга эмас, оила жуфтлигига тегишли равишда унга раҳна солиб туради.
Шу боис бепуштликдан кўра, бепушт никоҳ тўғрисида фикр юритиш тўғрироқдир. Бундай ҳолатда “айбдор”ни аниқлаш осон кечмайди. Чунки ҳар учтадан битта ҳолда бола кўриш функцияси ҳам эрда, ҳам хотинда пасайган бўлади. Юздан ўн нисбатда эса ҳар икки томон ҳам аъло даражада бўлиши мумкин, аммо ўртада фарзанд туғилмайди. Бундай эр-хотин ажрашиб, бошқа билан оила қурганда фарзанд кўради. Бунда асосий сабаб жуфтликларнинг бир-бирига мос келмаслигидир. Бу ўринда эр-хотиннинг иккаласи ҳам ”айбдор”, тўғрироғи, иккаласи ҳам “айбдор эмас”.
Айримларда эса гарчи жинсий функция кўрсаткичлари бир қарашда меъёрий бўлишига қарамай, жуфтлар ҳатто бир неча марта ўзгартирилганда ҳам фарзанд туғилмаслиги мумкин. Бепуштлик одатда битта ёки бир нечта абортлар, жинсий аъзоларнинг яллиғланиши, модда алмашинувининг бузилиши натижасида ривожланади. Уларнинг барчаси битта нарсага – ўз соғлигига енгил қарашга бориб тақалади. Жинсий аъзоларнинг яллиғланиши билан боғлиқ касалликлар аёлларда ҳам, эркакларда ҳам асосан жинсий алоқаларнинг “содда”лиги, турли-туманлиги ва пала-партишлиги туфайли келиб чиқади. Алоҳида таъкидлаш лозимки, носоғлом ҳаёт тарзи оқибатида фақат таносил касалликлари келиб чиқади, деб ўйлаш нотўғри. Оддийгина сурункали яллиғланиш касаллиги ҳам жуфтликлар ўртасида бир-бирига жинсий алоқа пайтида ўтиши ва бепуштликка олиб келиши мумкин.
Меъёрида ортиқча овқатланиш эндокрин жараёнларини издан чиқариши, натижада, уруғланиш механизмининг “синиб” қолишига олиб келиши аниқланган.
Бепуштлик нафақат ажралиш сабабчиси, балки аҳил эр-хотиннинг жуфтлиги учун ҳақиқий фожеа, кўп йиллик тинка қуритадиган ва ҳатто машаққатли даволаш муолажаларининг сабабчисидир. Алқисса, бепуштлик юқорида таъкидланганидек, касаллик ҳисобланмаса-да, “Касалликни даволашда кўра, унинг олдини олиш осонроқ” деган нақлга кўпроқ тааллуқли, десак янглишмаган бўламиз.
Муштарий