“Бирлик” партияси раиси ўринбосари Пўлат Охун томонидан бугун тарқатилган баёнотда Тожикистонда қурилаётган Роғун ГЭСининг келажакда минтақага, жумладан Ўзбекистонга хавф солиши мумкинлиги борасида хавотир билдирилган.
Биз ўзбек мухолифати фаолларининг бу масалага муносабати билан қизиқдик. Суҳбатдошимиз – “Бирдамлик” ҳаракатининг АҚШ бўлими раҳбари Бахтиёр Ҳасан.
– Сизнингча, Роғун ГЭСи ҳақиқатдан келажакда минтақага хавф солиши мумкинми?
Бахтиёр Ҳасан: -Ассалому алейкум ватандошлар Роғунда кетаётган қурилишларни, албатта, бу жуда катта минтақавий экологик хавф деб, тушуниш керак. Чунки, бундан нафақат ўзбек халқи, қолаверса Марказий Осиё давлатлари катта зарар кўради. Агар бу муаммони яна ҳам кучайса келажакда оқибати ёмон бўлиши мумкин. Роғун ГЭСи бу муаммоларни бошланишидир.
Агар айтайлик қурилиш тугаб (бир хаёлингизга келтиринга), ҳовузни сув билан тўлдириш жараёнини кўз ўнгингизга келтиринг. Бунинг учун анча йиллар керак бўлади. Амударё батамом беркитилиб, Қорақалпоқликларнинг шу кунгача чекаётган азоби эса хамир учидан патир бўлиб қолади.
– Роғун масаласида Ўзбекистон ва Тожикистон ўртасида кучайиб бораётган низода ким айбдор деб ўйлайсиз?
Б.Ҳ.: -Қарс икки қўлдан чиқади.
– Сизнингча бу муаммони қандай йўллар билан ҳал қилса бўлади?
Б.Ҳ.: -Йўллар кўп, лекин ҳар бир йўлнинг ўз машшақати бор. Албатта бу муаммони ҳал қилинишини фақат Европа ва АҚШ давлатларисиз тасаввур ҳам қилиб бўлмайди. Бу муаммоларни боши кеча туғилган йўқ. Шунинг учун бу муаммони ҳал қилиш йўли – келишув йўли бўлади. Раҳбарлар учрашуви ташкил қилиниши керак. Бунга албатта ўртада бир давлат ҳам туриши керак. Чунки, Ўзбекистон билан Тожикистон ўртасида келишиш бўлиши амри маҳол. Агар келишиладигон бўлса ҳам сал вақт ўтмай улар яна урушиб қолиши мумкин.
-Роғун ГЭСи қурилишида Россия ва АҚШ тутган мавқеъидан қай бири сизнингча муҳим?
Б.Ҳ.: -Бу иккала давлат ҳали ўзини конкрет фикрини билдиргани йўқ. Аммо, лекин биз мухолифатчиларга яна бир синов вақти келди, десам ҳеч адашмайман. Шундай пайтда биз ўзлигимизни кўрсатишимиз зарур. Шунинг учун ўзбек мухолифатини бу масалага одилона ёндашишини таклиф қиламан.
Агар келажакда ўзбек ва тожик халқлари ўртасида якдилликни хоҳласак бу муаммога эьтиборсиз бўлмаслигимиз керак. Бу муаммо фарзандларимиз келажагига салбий таьсир қилиши мумкин. Худо кўрсатмасин, икки давлат ўртасида уруш чиққудек бўлса, бунинг оқибати нима бўлишини ўзингиз тасаввур қилаверинг….
www.yangidunyo.com