Қашқадарё вилоятининг Нишон, Касби каби туманларида бўлган киши ғаройиб ҳолатнинг устидан чиқади. Далаларда, йўлларда, ҳатто одамларнинг ҳовлиларида ҳам қизил кабеллар тортиб қўйилган.
Икки-уч ойдан бери аҳвол шу, – дейди маҳаллий аҳоли.
Маълум бўлишича, нефть изловчилар бу кабелларни тортишган экан. Улар шу йўл билан қаерда нефть борлигини аниқлашар экан. Бу – хайрли иш, албатта. Мамлакатнинг нефтьга бўлган талаби бир оз қондирилиши мумкин. Аммо, энг ажабланарли воқеалар тунда содир бўлади. Аҳоли эндигина уйқуга кетганда ер силкина бошлайди. Ер тагига қазиб киритиб қўйилган портлатгич ишга солинади.
– Бу силкинишларнинг сабаби шундаки, пайтида осмондан туриб тортилган қизил кабелларни кузатиш орқали қаерда нефть борлиги аниқланади, – дермиш нефть изловчилар.
Энди бир ўйлаб кўринг: газсиз совуқ уйда қачон чироқ ёнаркин деб кутиб турган ёки эндигина ширин уйқуга кетган кишиларнинг хаёлини қаттиқ гумбурлаб портлаш бузиб юборса, ер силкина бошласа қандай аҳволга тушиш мумкин?
Ана шунақа гаплар. Йил бўйи пахта даласида меҳнат қилиб эндигина ором оламан деган кишилар додини кимга айтишни билмай овора. Фақат улар “бу ер силкинишларининг бир кун охири бўлар-ку” деган умид билан яшашмоқда.