Германиянинг Вашингтондаги элчихонаси биноси олдида ўтюрак шоир Юсуф Жума оила аъзолари ва “Бирдамлик” фаоллари Ўзбекистон қамоқхоналарида сақланаётган сиёсий маҳбусларни озодликка чиқариш талаби билан пикет ўтказишди, узлуксиз акция эртага Швеция, кейинчалик эса Франция, Бразилия ва Ўзбекистон элчихоналари олдида давом этади.
Акция иштирокчиси, айни пайтда Қорақалпоғистондаги “Жаслиқ” қамоқхонасида маҳбусхонада сақланаётган шоир Юсуф Жуманинг тўнғич ўғли, Демократик Ўзбекистон Конгресси аъзоси Алишер Юсуфжон ўғлининг маълум қилишича, улар 7 июнь куни Германиянинг Вашингтондаги элчихонасини пикет қилишган. “Бирдамлик” ҳаракати ташкил қилган пикетда Юсуф Жуманинг турмуш ўртоғи
“Бирдамлик” ҳаракатининг аёллар билан ишлаш бўлими раҳбари Гулнора Олтиева ва ҳаракатга яқинда аъзо бўлиб кирган шоирнинг икки ўғли – Қодирий ва Жавҳар Юсуфжон ўғли, шунингдек “Бирдамлик” фаоллари – Ёдгорбек Турлибеков, Исҳоқжон Зокиров, Баҳром ва Бурхон Чориевлар иштирок этишмоқда. -Биз эрталаб соат 11 да бошланиб кечки соат 17 гача давом этган пикетда
Каримов режимини қўллаб келаётган Германия ҳукуматига ўз норозиликларимизни билдирдик. Германия ҳукумати очиқдан очиқ диктатор Каримовни қўллаб келмоқда. Демократик мамлакат бўлгани ҳолда қийноқлар мунтазам қўлланиладиган Ўзбекистон ҳукумати билан ҳамкорлик қилмоқда. Биз пикетда Германия ҳукуматини Каримов билан ҳамкорлик қилишни тўхтатишни,
Юсуф Жумани ва бошқа сиёсий маҳбусларни озод этилишига ёрдам беришни талаб қилдик, -дейди Алишер. Олдинига элчихона ходимлари полиция чақириб пикетни тўхтатишга урунишган. Бироқ, элчихонага етиб келган полиция хизматчилари пикетчиларга АҚШ эркин, демократик мамлакат эканлигини, ҳар бир киши ўз норозилигини очиқ ифода этиш ҳуқуқига эга эканлигини маълум қилишган.
Узлуксиз пикет ҳақида хабар топган полиция хизматчилари кечасию кундузи, ҳар куни ўтказиладиган акцияларда пикетчилар хавфсизлигини тўла таъминлашга ҳозир эканликларини билдиришган. Биз соат 17 гача Германия элчихонасини пикет қилдик. Кечки пайт элчихона вакиллари чиқиб бизни суратга олишди, талабларимизни ўрганиб, имкони борича ёрдам беришга ваъда қилишди.
Биз шундан сўнг акцияни тўхтатдик,-дейди Алишер. Ўзбекистондаги сиёсий маҳбуслар озодлигини талаб қилиб ўтказилаётган акция эртага, Европа Иттифоқи раислигини олган Швеция элчихонаси олдида давом этади. Ундан кейин эса Ўзбекистон ҳукуматига ЕИ томонидан қўйилган санкцияларни олиб ташланишига ёрдам берган Франция ҳамда Каримов билан дўстлашаётган Бразилия элчихоналари олдида узлуксиз- кечасию, кундузи пикетлар ташкил қилинади.
-Ҳозир Вашингтонда қоронғу тушиб бормоқда. Шунга қарамасдан биз Швеция элчихонаси томонга кетаяпмиз. Полиция бизни хавфсизлигимизни тўла таъминлаб турибди. Узлуксиз акция давом этади, -дейди биз билан суҳбатда Алишер Юсуфжон ўғли.
Юсуф Расул.
www.yangidunyo.com