Бу саволга жавоб излаб, Гулистон шаҳар марказий алоқа бўлимига бориб қолдим. Тасодифни қарангки, айнан шу куни фуқароларга нафақа тарқатилаётган экан. Тумонат одам. Ҳамманинг нигоҳи нафақа тарқатувчи алоқа хизмати ходимига қаратилган. Одам ниҳоятда кўплигига қарамай барча навбат билан яқинлашиб, жанжалсиз, тўполонсиз навбати яқинлашганида пул тарқатиш варақасига имзо чекиб, ўзига тегишли маблағни олиб, индамай чиқиб кетмоқда.
Навбати етиб келмаганлар, ўртага қўйилган стулга, стул етмаганлари девор четидаги рокида (ступенка)да индамай ўтириб ўз навбатини кутмоқда. Нафақахўрларнинг ичида ёшлари кам, чунки ёшлар хизматда, кексалар иззатда. Тасодифни қарангки, Ўзбекистон республикаси Сирдарё вилоят Халқ депутатлари Кенгаши депутати, Сенатор Ҳаётхон Ортиқбоевахоним қўлларида қора сумка билан алоқа бўлимига кириб келдилар.
Наҳотки Сенаторхоним нафақа олиш учун навбатда турган кексалар ҳолидан хабар олгани келган бўлсалар, дея қизиқишим ортди. Минг афсуслар бўлсинки, Сенатор Ҳаётхон Ортиқбоевани навбатда турган қарияларнинг аҳволи қизиқтирмади, маълум бўлишича бу мўътабар инсоннинг ўзлари шу топда нафақа олгани кирган эканлар.
Буни билгач воқеанинг кейинги ривожини кузата бошладим. Навбат билан нафақа тарқатаётган алоқа бўлими ходими ўз ишини ўша суръатда давом эттирар экан, бир маҳал ичкаридан бошқа ходим пул тўла катта сумкани кўтариб чикди ва пул тарқатиш варақасини ҳозиргина кириб келган Сенаторхоним олдига қўйиб, таббарук, жимжимадор имзоларини қўйдириб олди.
Шундан сўнг сумкадан оз эмас, кўп эмас нақ 165 000 (бир юз олтмиш беш минг) сўм олиб, санаб муборак қўлларга берди. Бундай илтифотдан хурсанд бўлган Ҳаётхон Ортиқбоева алоқа бўлими ходимини қуруқ қолдирмай, худди ғарб киноларида хизматкорга узатилагинидай 500 сўм ташлади ва навбатда турганларга бир сўз айтмай виқор билан чиқиб кетди.
Шунда навбатда турган кекса нафақахўрларнинг кўзларига тикилар эканман, Сенатор Ҳаётхон Ортиқбоевани танийдиган аҳолининг кўзларида ҳасад эмас, ғазаб ёки эътироз ҳам эмас, ҳавасни кўрдим. Ўша топда шўрлик нафақахўрлар ҳаёлида “эх, қани эди мен ҳам Сенатор бўлганимда, менга ҳам навбатсиз нафақалар беришарди” деган фикр ўтаётганини ўқиб олиш қийин эмас эди.
Ҳақиқатдан ҳам Сенатор бўлиш қандай яхши. Йўлда кетаётганингда нафақат оддий фуқаро ҳатто шаҳар ҳокимиям эгилиб, каттакон коптокдек қорни устига қўлини қўйиб салом беради. Чунки Сенатор ҳокимдан улуғроқда, бунинг устига доимий ҳимояда, ахир қандай яхши. Сенаторларимиз тўғрисида сўз юритар эканмиз, бир ҳақиқатни ҳам айтиб, эслаб ўтиш жоиз.
Сайлов жараёнида ҳамма оғзидан бол томиб оддий фуқароларга кўп ваъдалар қилган, баландпарвоз сўзларни айтиб кўнглини олган. Оддий фуқаро бу ваъдаларга ишониб, уларга овоз берди, аммо бошларига ташвиш тушиб, сайлаганлари ёнига борганларида эса… Асосан аёллардан таркиб топган бир гуруҳ шаҳарликлар бошларига мушкул тушиб,
Сенатор Ҳаётхон Ортиқбоева қабулига боришганида “менинг қўлимдан ҳеч нарса келмайди, бундай масалаларни фақат ҳоким ҳал қилади”, деб чиқариб юборган. Бундай ҳолатлар кўп марта бўлганлигини эшитганмиз. Ҳуқуқ ва эркинликлари бузилган оддий фуқароларга нисбатан қилинган бундай жавобдан кейин қандай қилиб хоним кўнгилга ўтирсин.
Бу билан Сенатор Ҳаётхон Ортиқбоева хонимнинг муборак шаънига таҳдид қилиш мақсадимиз йўқ, фақатгина ул мўътабар инсон ҳам бир ҳақиқатни унутмасинлар, кўп эсласинлар демоқчимиз, холос. Яъни, мансаб, шону-шуҳрат ўткинчи нарса, кўз юмиб-очгунча ўтиб кетади.
Ҳаммаси кетиб дўстнинг ёрдамига муҳтожлик сезилганида, бир вақтлар менсимай қараганинг фуқаролар кўзига қандай қарашимизни ҳозирдан ўйлаб боришни унитмаслиг керак деймизда. Бор гап шу…
“Бирдамлик” ҳаракати Сирдарё вилояти матбуот маркази.