Бу тинимсиз ёғаётган ёмғирлар бу ёмғир эмас бизнинг аччиқ кўз ёшларимиз. Чунки 5.000 га яқин фермернинг охини худодан бошқа ҳеч ким тингламади-да. Бу оғир кўз ёшларни кўтариб туриш Аллоҳга ҳам оғирлик қилаяпти шекилли –дейишади суҳбатда ери ноқонуний тортиб олинган, айни кунлар ишсиз юрган фермерлар.
Дарвоқе тинимсиз ёғаётган ёмғир ҳали бери тўхтайдиганга ўхшамайди. Бу ёмғирлар натижасида экилган чигитлар чириб кетди. Тинимсиз ёғаётган ёмғир фермерларнинг барча меҳнатларини пучга чиқарди.Ер тайёрлашдан бошлаб чигит экунгачалик бўлган барча меҳнатлар, қанча ёқилғи, қанча химиявий ўғитлар, дорилар, қанча чигит уруғи, ишчи кучлари зоя кетди.
Бундан эса оқибатда фермерлар миллион-миллион зарар кўрди ва кўраяпти. Қайта экишнинг эса имконини тополмай жонсарак бўлиб туришибди. Чигит экиш эса кун сайин кечикиб кетмоқда. Кўз тикиб турган бор буғдой ҳосили ҳам шубҳа остида қолмоқда. Чунки об- ҳавонинг исиб кетмаслиги, ҳаддан зиёд намгарчилик ва тинимсиз ёмғир натижасида буғдойга ҳам “занг” касаллиги тушиб кетмоқда.
Бу касаллик буғдойнинг тинкасини қуритаяпти. Бу ҳам шўрлик фермерларнинг чунтагига зарар дегани. Фермерлар эса 2009- йилги ҳосилдорликнинг, шартнамовий режаларнинг бажарилишдан хавотирланишмоқда.
Саида Қурбон.