Ўзбекистонда “Бирдамлик” ҳаракати 5 йилдан буён инсонпарварлик ёрдами, кам таъминланган оилаларни қўллаб қувватлаш, ҳуқуқий кўмак кўрсатиш, жамиятдаги порахўрликка қарши кураш акцияларини ўтказиш каби ҳайирли ишлар билан жамоатчилик эътиборини қозонди. Бирдамликнинг 5 ёшга тўлганлиги муносабати билан ҳаракатнинг Навоий вилояти аъзолари юбилей акциясини ўтказди.
10 апрель куни Навоий шаҳрининг Навоий боғида уюштирилган тадбирда “Бирдамлик” ҳаракатининг Навоий ва Кармана шаҳарлари, Хатирчи, Қизилтепа, Конимех, Навбаҳор, Нурота туманлари етакчилари, шунингдек ҳар бир шаҳар ва тумандан 5 нафардан ҳаракат аъзоларининг вакиллари қатнашдилар. Юбилей акциясининг айнан Навоий боғида ўтказилишдан кўзланган мақсад, ҳаракат аъзоларининг оилалари,
фарзандларига эътибор қаратилиб, кўл атрофи ва болалар уйингоҳи, аттракционлар юбилей қатнашчиларига хизмат қилди.“Мен жамиятдаги айрим раҳбарларнинг порахўрлиги, ногиронларнинг фақирлиги муаммосидан безиганман, чунки ўзим имконияти чекланган инсонман. Бу дардли турмуш, иқтисодий қийинчилигу фуқароларни таҳқирлайдиган ҳаётнинг ёзилмаган минг бир қонунлари одамни ҳаракатга чорлайди.
Шунда мен “Бирдамлик” ҳаракатини танладим”, дейди тантана иштирокчиси, ҳаракат аъзоси Дилдора Боймуродова. Байрам тадбирининг яна бир иштирокчиси, ҳаракат аъзоси нуроталик Берди Нуралиев ҳаракат сафига айнан эзгу мақсадлар йўлида қўшилгани ва бу мақсадлар амалга ошишига умидворлигини айтди. “Биздаги ишсизлик муаммоси кўпчиликни қийнайди.
Тўғри, қишлоқ хўжалиги билан шуғуланамиз, аммо, топганимиз ўзимизга етмайди. Туманда ишлаб чиқариш, саноат йўқ. Кредит олиб бирор бир корхона очаман десам, банклардан маблағ олиш пора эвазига. Одамларимизнинг банкларга ишончи сўнган. Мен бу ҳаракатга инсофли, диёнатли одамларнинг жамиятни у ёки бу иллатлардан тозалашига ишониб аъзо бўлдим.
Айрим нопок одамлар Ўзбекистондан ўз манфаати йўлида фойдаланишига қараб ўтиролмайман”. Юбилей акцияси кечга қадар давом этди. “Бирдамлик” ҳаракати аъзоларининг мақсади, Ўзбекистонда фуқаролик жамияти барпо этиш. Ўзбекистоннинг тараққиётини, оилалар фаровонлиги, одамларнинг турмуш шароити даражасини белгилар экан, демак ҳали ҳаракат давом этади.
Навоий “Бирдамлик” ҳаракати хабари.