15 апрел сешанба куни пойтахт Тошкентнинг Буюк ипак йўли кўчасида, куппа-кундузи таниқли ҳуқуқ ҳимоячиси, Ўзбекистон Ҳуқуқ ҳимоячилари Альянси уюшмаси асосчиси ва раиси 52-ёшли Елена Урлаевага нисбатан ҳужум уюштирилди. Урлаеванинг сўзларига кўра, ҳужум у истиқомат қилувчи кўп қаватли уй подъездларидан бири олдида рўй берган.
Тўсатдан пайдо бўлган икки алпқомат йигитлар ҳеч бир тушунтиришсиз аёлни кескин калтаклай бошлаган. Йигитлардан бири Елена Урлаеванинг сочларидан тортиб унинг ҳимояланиш имкониятини чеклашга уринган бир пайтда, иккинчи йигит унинг кўкрак қисми ва икки биқинига кучли зарбалар қилган. Сўнгра йигитлардан бири ёнидан пичоқ чиқариб,
Ҳуқуқ ҳимоячисининг чарм курткасини йиртиб ташлаган. Елена Урлаеванинг оммавий ахборот воситаларига берган интервьюсида айтишича, калтаклаш иштирокчилари айни жараён давомида бир неча бор “ҳали ҳам кетмадингми? Огоҳлантиришимизни писанд қилмадингми?” дея такрорлаган кейин эса “мамлакатдан чиқиб кет, акс ҳолда”, дея пўписа ҳам қилган.
Елена Урлаеванинг таҳмин қилишича, бу ҳужумни хавфсизлик хизмати ходимлари уюштирган бўлиши мумкин. Зеро Ҳуқуқ ҳимоячисига кўра, ҳужум кунига қадар икки-уч кун давомида у муттасил кузатув остида бўлган. Кузатув олиб бораётган шахслар унинг ҳар бир қадамини видеокамера ёрдамида тасвирга тушириб борган.
Ҳатто Ҳуқуқ ҳимоячиси калтакланиш пайтида ҳам, хавфсизлик хизмати ходимлари бу жараённи тасвирга олаётганини кўрган. Маълум бўлишича Мирзо Улуғбек туман ички ишлар ходимлари ҳамда шаҳар милицияси мазкур ҳужум юзасидан текширув ишлари олиб бормоқда, аммо Ҳуқуқ ҳимоячиси бу ҳаракатларнинг қандайдир натижа беришига ишонмаётир.
Унинг айтишича, ҳужум иштирокчиларини аниқлаш ва жазолаш истаги ҳаққоний бўлса, у ҳолда милиция ходимлари кузатув олиб бораётган хавфсизлик хизмати ходимларини сўроққа жалб этиб, муҳрлаб олинган тасвирни ашёвий далил сифатида талаб қилишлари лозим.
“Бирдамлик” ҳаракати Тошкент шаҳар матбуот хизмати.