“Бирдамлик” ҳаракати фаоли Анварбек.
Ўзбекистон Республикасининг расмийлари томонидан бошқариб бориладиган расмий “Ўз.А” ахборот агентлиги мухбири Д.Эшонованинг хабар беришича мамлакатимизнинг ишлаб чиқариш имконияти кундан-кунга кенгайиб бормоқда. Шу ўринда www.birdamlik.info ўқувчиларнинг ҳам хабар билан яқиндан таништириш мақсадида маълумотдан ихтибос келтирсак:
“Бахт шаҳрида фаолият юритаётган “Бахтмойинвест” корхонаси Сирдарё вилояти иқтисодиётига муносиб ҳисса қўшиб келмоқда. Хориждан замонавий технологик линиялар келтирилиб ўрнатилгач, бу ерда чигитдан сифатли ўсимлик мойи, шунингдек, кунжара, шелуха сингари чорва озуқаси ишлаб чиқариш имконияти кенгайди. Айни пайтда бир кеча-кундузда юз тонна чигитни қайта ишлаш қувватига эга корхонада 90 нафарга яқин йигит-қиз меҳнат қилмоқда.”
Хабарни ўқиган ҳар қандай ўқувчи Ўзбекистон жаннатмакон юртга айланганини ҳис этгандек бўлади. Лекин ҳис этмайди. Сабаб чор атрофда содир бўлаётган воқеалар ва ўтган 2008-йилнинг ёз ойларида бўлиб ўтган ёғ ва нон танқислиги, шунингдек нарх-навонинг кундан-кунга кўкка ўрмалаётгани инсонлар қалбидаги расмий хабарларга нисбатан бўлган ишончни йўқотади. Агар расмий хабарда келтирилган ушбу маълумотлар айни ҳақиқат бўлганида бугунги кунда чорвачиликка ихтисослашган ферма раҳбарлари бир тонна кунжара истаб вилоят маркази Гулистон шаҳрига қадар келишмаган бўлар эди.
Тўғри, вилоятнинг Бахт шаҳрида “Бахтмойинвест” корхонаси ишлаб турибди. Лекин бу шаҳардаги ишсизлик батамом ўз ечимини топди дегани эмас. Корхонада ишлаётган 90 нафар ишчининг ҳам яримидан ошиғи сал бурун Россия ва ёки Қозоқстон давлатларида ишлаб ўз соғлиқларини қисман йўқотиб келган ишчилардир. Уларнинг соғлиғи яна қайтадан яқин хорижга бориб ишлаб келишни кўтармагани боис ойлик маоши кам бўлсада мажбуран “Бахтмойинвест” корхонасида ишлашмоқда.
Қолаверса корхонанинг ишга туширилганига анчагина бўлиб қолган бўлсада, ҳозирги кунга қадар тўла қувват билан ишлагани йўқ. Сабаб хом ашё –чигит етарлик эмас. Чунки, пахта тозалаш заводлари томонидан ишлаб чиқарилаётган чигит ўз манзиллари—“Бахтмойинвест” каби корхоналарга етиб келмасидан бурун яширин фаолият олиб борувчи цех рахбарлари томонидан ўзлаштирилиб юборилмоқда. Шу ўринда фактларга назар ташласак:
Тасдиқланган ва муттахасислар томонидан қайд этилган ҳисоб-китобларга кўра Ўзбекистон Республикасининг чекка қишлоқларида истиқомат қилаётган аҳолининг 97%и бугунги кунда қўлда ишлаб чиқарилган ва тиндирилмаган пахта ёғи истемол қилмоқда. Янада тушунарлироқ бўлиши учун такидлаб ўтадиган бўлсак, мамлакатимиз аҳолиси қўлбола чигитни қайта ишловчи цехлар томонидан ишлаб чиқарилган пахта ёғини магазин расталарида турган ва расмий рўйхатдан ўтган корхоналар томонидан ишлаб чиқарилган пахта ёғига нисбатан кўпроқ ишлатмоқда.
Хўш нима учун? Сабаб мамлакат иқтисодиётининг кескин ортга кетиши натижасида кузатилаётган иқтисодий инқироз фуқароларнинг бир оз қиммат лекин сифатли бўлган маҳсулотлар сотиб олишини чеклаб қўйган. Буни мамлакатнинг барча амалдорлари ва ҳаттоки шу хабарни тарқатаётган Д.Эшонованинг ўзи ҳам билади. Лекин у ва у каби ўзга тўтиқушдек сайраётган расмий мухбирларнинг ҳам бола-чақаси бор. Айнан шунинг учун, тирикчилик қилиш хаётий зарурат бўлгани учун ҳам ҳақиқатдан йироқ хабарлар тарқатиб туришади. Халқни алдаб тургани учун эса уларга бюжет ҳисобидан маош тўланади. Мана сизга жаннатмакон юртдаги вазиятнинг асл башараси.