Жорий 2008 йил ўз поёнига етиб борар экан, кечаётган йилда ким нималарга эришдию, яна нималардан афсусда? Янги йилдан кутаётган умидларию режалаётган ишлари қандай? Би-би-си Ўзбек Хизмати Янги йил арафасида бу хусусда турфа ўзбекистонликларнинг фикрларини бериб бориш ниятидадир. Сўнгги қаҳрамонимиз Ўзбекистон халқ артисти, «Ялла» гуруҳининг раҳбари Фаррух Зокиров:
Фаррух Зокиров: Нолисам гуноҳ бўлар, умуман жорий йил мен учун яхши кечди. Сафарлар кўп, талаб катта. Бир нечта янги ясарлар яратдик. Ижодий жиҳатдан жуда ҳам унумли йил бўлди. Соғлиқ тарафдан ҳам…Кейин мана, мен ҳозир қариган чоғимда уй қураяпман. Шунинг учун ҳам ҳозир бизни ўйлантираётган асосий масала тезроқ шу уйни қуриб олсагу тинчгина кўчиб ўтиб, қаричиликда ўша ерда умр кечирсак, деган мақсаддир. Асосий ҳаракат – шу уйни тугатиб олиш. Гастрол сафарларига келадиган бўлсак, Исроилдаги концертларимиз жуда яхши ўтди. Россия бўйлаб жуда чиройли концертлар бердик. Кейин Қозоғистонда, Татаристонда ниҳоятда яхши концертларимиз бўлиб ўтди. Татаристонга кўпроқ бориб турамиз. Чунки тилимиз бир, кўп анъаналаримиз ўхшайди, шунинг учун ҳам Татаристонга кўп таклиф этишади. Лекин деярли бир эсда қоладиган, масалан, Нобель мукофоти олганим йўқ (кулади). Энди, мана, бутун дунёда молиявий инқироз бўлаяпти, бошқа бўлаяпти, аммо бизда Худога шукр, қандайдир барқарорлик бор.
Би-би-си: Фаррух ака, 2008 йилда яратган бирор бир ашулангиздан хиргойи қилиб бера оласизми?
Фаррух Зокиров: Мана, агар хотирангизда бўлса, 1947 йилда яратилган бир фильм бор. “Аршин мал олан” деган мусиқий фильм. Энди бу бутун Шарқда жуда ҳам оммабоп, “популярный” бўлган фильм. Ўша фильмдан иккита-учта қўшиқларини тикладик. Ҳозир томошабинлар, тингловчилар жуда ҳам катта қизиқиш билан мириқиб эшитишяпти. Агар эсингизда бўлса:
“Аршин мал олан
Хожу по дворам…”
Шу эски бўлса ҳам жудаям қизиқарли. Кейин мусиқасини Сулаймон Юдаков ёзган “Майсаранинг иши”дан бир қанча номерларни тикладик. Томошабинлар бунга жуда ҳам қизиқиш билан эътибор беришяпти.
Би-би-си: Фаррух ака, келаси 2009 йилга режаларингиз қандай энди? Қайси давлатларда концерт бермоқчисиз, қандай янги ашулалар устида ишламоқчисиз?
Фаррух Зокиров: Мана, Янги йил арафасида Россияга чақиришяпти, Қозоғистонга чақиришяпти. Қирғизистонда бўламиз. Кейин ўзимизда жуда ҳам қизиқарли телевизион шоулар суратга олиниши керак. Ўшаларда иштирок этамиз. Энди биз учун гастрол сафарлари қанчалик кўп бўлса, ишимиз ҳам шунчалик унумли, қизиқарли бўлади. Мана, бу йил “Ялла” ансамблининг ташкил топганига 38 йил бўларкан. Бу чакана гап, чакана рақам эмас. Бу жанр учун 38 йил – бемалол Гиннеснинг рекордлар китобига кириш учун ҳам мурожаат қилсак бўлади. Чунки бу тарихда бўлмаган ҳол. Мана, масалан, “стабил” ҳолда 38 йил ҳеч қайси бир ижодий гуруҳ умр кўрмаган экан. Энди, мана, Худо хоҳласа, ҳадемай бир-икки йиллардан кейин 40 йиллиги бўлади. Энди ўшани бир яхшилаб нишонласак керак. Худо хоҳласа, келаси йил шунга тайёргарлик билан кечади.
Би-би-си: Фаррух ака, мана йил якунланиб борар экан, ўзбекистонликларга, ўзбек халқига нималарни тилаган бўлардингиз?
Фаррух Зокиров: Дунёда нималар бўлаётганини ўзларингиз ҳам кўриб турибсизлар. Шу сабабдан ҳам, авваламбор тинчлик! Айниқса, бизнинг шароитда, бизнинг минтақада бу – энг муҳим нарса. Мана, Ўзбекистоннинг аҳолиси 25 миллион. Демак, агар бизда тинчлик бўлса, бу атрофда ҳам тинчлик дегани. Авваламбор тинч, мовий осмон тилаган бўлардим. Кейин ўзбек халқи тўй-ҳашамларни жуда яхши кўради, илоҳим, файз-барака берсин, илоҳим, дастурхонлари тўкин-сочин бўлсин, нима ният қилган бўлишса, ниятларига етиб юришсин. Агар тинчлик бўлса, ўша тўйларни ҳам қилиш мумкин, тўйлар кўп бўлса, демак бизларга ҳам хизмат кўпаяди. Ўша яхши кунларда, хурсандчилик кунларда санъаткорларнинг хизматлари кўпайсин, деган ниятда қоламан.
——————————————————————————–
Навбатдаги қаҳрамонимиз Ўзбекистонда хизмат кўрсатган хонанда Севара Назархон:
Севара Назарахон: Мен учун 2008 йилнинг энг асосий ва эсда қоларли воқеаси – тўнғич фарзандим, яъни ўғлимнинг дунёга келиши бўлди. Мен баҳор мавсумининг илк кунида, 1 март куни фарзандли бўлди. Ўғлимнинг пойқадами мен учун жуда қутлуғ келди. Лондонда, таниқли продюссер Питер Габриелнинг “Real World Records” студиясида ёзилган иккинчи альбомим дунё юзини кўрди. “Сен” номли мазкур альбомим ҳозир Оврўпода бўлгани каби Америкада ҳам сотувга чиққан. Муайян сабабларга кўра, жорий йилда Ўзбекистонда яккахон концерт бера олганимча йўқ. Лекин жуда кўп гастрол сафарларига чиқаяпман. Бу шунчалик одатга айланиб қолганки, мен ҳозир ижодий сафарларсиз ҳаётимни тасаввур эта олмайман. Оврўпонинг бир қатор давлатларида бўлдим. Яқиндагина Францияга бордик, Испанияда бўлдик, у ерда коцерт бериш билан бирга дам ҳам олдик, Америкада ҳам бир нечта концерт бердим. Америкадан кейин Москва, Алматида бўлдик. Жуда кўп деб бўлмаса-да, жорий йилда етарлича гастролда бўлдим деб айта оламан. Айниқса, бир вақтнинг ўзида она эканимни ҳам назарда тутадиган бўлсам…
Би-би-си: Севарахон, янги 2009 йилга режаларингиз қандай энди?
Севара Назархон: Худо хоҳласа 2009 йилга режалар кўп. Рус тилида альбом чиқариш ниятим бор. Ҳозир шунинг устида ишлаяпмиз. Бундан ташқари менинг иштирокимда “Чудесная история” деб номланган жуда ҳам яхши бир фильм суратга олиниши керак. Фильмда Дима Дебров каби россиялик актёрлар билан бир қаторда кўплаб ўзбекистонлик санъаткорлар, жумладан, Мирзо Холметов каби ҳажвчилар ҳам иштирок этишади. Ўз навбатида янги йилда ҳам концертларим давом этишини, бир жойда тўхтаб қолмаслигини истайман, албатта. Худо хоҳласа, тез орада Тошкентда ҳам концерт бериш истагим бор. Буни сал аввалроқ режалаганмиз. Умид қиламанки, концерт томошабинлар томонидан қизғин кутиб олинади. Гастрол сафарларига келадиган бўлсак, альбомингиз чиқиши билан концерт беришга оид таклифлар ёғилиб кетади. Тез орада Швецарияга концерт бериш учун борамиз. Ундан кейин Бельгияга,…яъни асосан Оврўпо давлатларига.
Би-би-си: Севарахон, энг сўнггида Ўзбекистон халқига ўз Янги йил тилакларингизни ҳам изҳор этсангиз…
Севара Назархон: Мен Янги йилда Ўзбекистонга, ўзбек халқига соғ-омонлик тилайман. Имкон қадар ҳар хил касалликлар улардан йироқ юрсин. Яна уларга шоду-хуррамлик, ишчанлик, энг муҳими, яхши кайфият тилаб қоламан. Нима бўлишидан қатъиназар, ҳамиша олға қадам босишлари, ҳеч қачон қайғуга тушмасликлари, ҳамиша соғ-омон эканликларидан хурсанд бўлиб юришларини истайман.
——————————————————————————–
Навбатдаги қаҳрамонимиз футбол бўйича Ўзбекистон миллий жамоаси бош мураббийси ва «Бунёдкор» клуби ҳаммураббийси Миржалол Қосимов:
Миржалол Қосимов: Албатта, 2008 йил ёмон йил бўлгани йўқ. Хусусан, “Бунёдкор” жамоаси учун яхши йил бўлди. Нимагаки, “Бунёдкор” Ўзбекистон Кубоги соҳиби, Ўзбекистон чемпиони бўлди, Осиё Чемпионлар Лигасининг ярим финалига чиқди. Бу – албатта, “Бунёдкор” жамоаси учун катта ютуқ. Агар Ўзбекистон миллий терма жамоаси ҳақида сўз юритадиган бўлсак, миллий жамоамиз ҳам Жаҳон чемпионати саралаш босқич ўйинларининг тўртинчи босқичига чиқишга муваффақ бўлди. Энг қувонарлиси, футбол бўйича ёшлар миллий терма жамоаси Жаҳон чемпионатига йўлланмани қўлга киритишди. Албатта, бу каби катта ютуқ билан Аҳмад ака Убайдуллаевни чин кўнгилдан табриклайман. Нимагаки, Ўзбекистон Футбол уюшмаси раҳбарияти томонидан қилинаётган катта ишлар эвазига йигитларимиз ўша ишончни оқлашди деб ўйлайман. Умид қиламанки, энди Худо хоҳласа, 2009 йил миллий терма жамоамиз ҳам, ёшларимиз ҳам Мисрда бўлиб ўтадиган Жаҳон чемпионатида ўзларининг чиройли ўйинлари билан бутун ўзбек халқини, Ўзбекистонни, қолаверса, Ўзбекистондан четда бўлган мухлисларимизни ўз ўйинлари билан хурсанд этишади.
Би-би-си: 2009 йилга Ўзбекистон миллий жамоасининг бош мураббийси ва “Бунёдкор” клубининг ҳаммураббийси сифатида асосий умидларингиз, режаларингиз нима энди? Янги йилга нималарни режалаштираяпсизлар?
Миржалол Қосимов: Энди миллий терма жамоага келадиган бўлсак, 28 январда Бирлашган Араб Амирликларида Осиё Кубогининг саралаш босқич ўйинлари бошланади. Шу билан миллий терма жамоамизнинг ўйинлари расман бошланади. Ва қолаверса, 11 февралда Баҳрейнда Жаҳон чемпионатининг саралаш босқич ўйинларидаги навбатдаги учрашувимиз бўлиб ўтади. Шу ўйинларимиз орқали ўз мухлисларимизни хурсанд қилиб, очкомиз кам бўлишига қарамасдан, иложи борича ҳар битта ўйинга жиддий тайёргарлик кўриб, Жаҳон чемпионатига йўлланма олишга ҳаракат қиламиз.
Би-би-си: Янги 2009 йил арафасида Ўзбекистон халқига, ишқибозларингизга Янги йил тилакларингиз, уларга нималарани тилаб қолган бўлардингиз?
Миржалол Қосимов: Энг аввало шуни айтишим керакки, уларга тилакларим самимий. Авваламбор юртимиз тинч бўлсин, бутун ўзбек халқига, Ўзбекистон ва четда ишлаётган барча ўзбекистонликларга, албатта, соғлиқ тилайман, ишларида ривож, ҳозир футбол сифатли кетаяпти, ўйлайманки, ўз ўйинларимиз билан мухлисларимизни 2009 йилда хурсанд қилиб, хушнуд қилиб юрамиз. Ишқибозларга ҳам, бутун Ўзбек халқига ҳам энг кераклиси – соғлиқ тилайман!
——————————————————————————–
Навбатдаги қаҳрамонимиз «Эрк» демократик партиясининг аъзоси, бундан бир неча йил бурун Ўзбекистонни сиёсий таъқиблар туфайли тарк этган, ҳозир Россияда сиёсий бошпана изловчи мақомига эга бўлган ва қурувчилик орқасидан пул топаётган Муҳаммаджон Исломов:
Муҳаммаджон Исломов: Йигитларимиз Россия ҳудудида қилаётган ишлари асосан оғир меҳнат, яъни қурилиш, ер кавлаш, бетон қуйиш, аёлларимиз эса, кўчалар, дўконларнинг олдиларини супуриш, у ердаги ахлатларни тозалаш ишлари билан шуғулланишади. Уларнинг маълумотлари олий бўлса ҳам бирорта бошқа вазифа берилмайди, агар шартнома асосида ишлайдиган бўлса, ҳар бир фуқаро учун ўртача ҳисобда 10.000 Россия рубли миқдорида сарф-харажат талаб қилинади. 2008 йилимиз Ўзбекистондан келадиган муҳожирлар учун қандай кечди, дейдиган бўлсак, сизга шундай деб жавоб бера олган бўлардим – бечоралар баҳордан бошлаб, ёзи билан ишлаб, шу тўй-пўйини ўтказиб, бирортаси 5 йил олдин уй бошлаб қўйган бўлса, энди битай деб қолди, деган гапларини эшитаман. Дунёдаги молиявий инқироз ҳам бечораларнинг бошларига ташвиш бўлди. Ҳалигача олти ойлаб, уч ойлаб ойлигини олиб, уйимга кетаман, деган умид билан юрганлар ҳали кета олганлари йўқ. Айрим маълумотларга кўра, ҳозир Россиянинг 485 ташкилоти ўзининг фуқароларидан 3 миллиард рубль қарз бўлиб қолибди, ҳали бу Марказий Осиёдан келган фуқароларни қўятурайлик!.. У бечоралар фақат йиғлаб ва нола қилиб мурожаат қилишади. “Менинг пулимни бермаяпти, мени пулимни бермай кетди, мен қандай қилиб шу фирмадан пулим олсам,..” деган нолаларни эшитасиз, холос. Йил бошидан буён (!) уйга энг кўпи билан масалан, 1.200, 1.300, бировлари 1.800 долларгача жўната олган бўлишса керак. Энди Ўзбекистоннинг қазилма бойликларини олиб қарасангиз, ундан чиқадиган тилла, ундан чиқадиган газ, ундан чиқадиган нефть ва бечора меҳнаткаш халқимиз етиштирган қишлоқ хўжалик маҳсулотлари, шунча йиллаб пахтадан қўллари тирмаланиб яшаб келган халқимиз бугунги кунда шунга ҳам зор бўлиб қолди бечоралар! Бундай олиб қарасангиз, ҳозирги кунда бир халта унингиз 48.000 сўм экан, а гўшт эса, бир килоси 6.000 сўм экан…
Би-би-си: Энди 2009 йилга режаларингиз қандай, нималарни мўлжаллаяпсиз?
Муҳаммаджон Исломов: Энди бу йил Сичқон йили-да, ўзи Сичқон йили ота-боболаримиз айтган гапларига қараганда сал қимматроқ бўлиб келаркан, келаси йил энди билмадим, йил яхши келиб қолса, Бирлашган Миллатлар Қочқинлар бўйича Олий комиссарлиги ваколатхонаси яқинда ҳужжатларимни яна қайтадан сўраганди, яъни бирор бир Оврўпо давлати элчихонасига топшириб, ўша ерга чиқариб юборамиз, деган ваъдани беришди. Билмадим, балки амалга ошиб қолса, шу Россиядан, эски Шўро давлатларидан нарироққа кетсамми, деган ниятим бор. Ўзбекистонга қайтсак, жойимиз яна ўша Қорақалпоғистондаги қамоқхона бўлса керак…
Би-би-си: Россияда қурилиш ишларида банд эканингиз сабаби нимада?
Муҳаммаджон Исломов: Энди, касбимизга боғланиб қолганмиз-да, шунинг учун қурилишда нима бўлса ҳам тўрт-беш сўп топиладими деб, шу билан юрибмиз…Ўзи касбим муҳандис, яъни қурилиш инженери бўлсам ҳам, Россия ҳудудидаги қурилиш корхоналарига бизнинг маълумотимиз камлик қиларкан. Уларда 27 ёшга кирган бир ёшгина, бу лойиҳа нима эканлигини билмайдиганлар “прораб”, бошлиқ бўлиб олар экану бошқа Марказий Осиёдан келган академик ёки профессор бўлса ҳам, улар билимга эга эмас экан, уларни қониқтирмас экан.
Би-би-си: Ўзбекистон халқига янги 2009 йилда нималарни тилаган бўлар эдингиз?
Муҳаммаджон Исломов: Келадиган йилимиз шу ўзбек халқининг пешонасига Қуёш, ёруғлик келтирадиган йил бўлса. Бечоралар ҳам инсон сифатида ўзини, “Ўзбекман, биз ҳам халқ эканмиз,” деб таниса. Тўй-томошаси кўпайиб, ҳозир бола-чақасини қийналиб боқадиган халқимизга Аллоҳу Таоло яхши бир ёруғ йўллар берса…Шу бечоралар ҳам қийинчиликларини унутиб, улар ҳам шу ўзга юртларда мардикор, чўри бўлиб юргандан кўра, ўзининг юртида юртини обод қилса, деган ниятим….
——————————————————————————–
Илк қаҳрамонимиз Буюк Британияда таҳсил олаётган ўзбекистонлик талаба:
Энди, талаба сифатида шуни айтишим мумкинки, йил давомида ҳар доим ўқишда ўзимни ривожлантиришга ҳаракат қилиб келдим. Менинг соҳам тиббиёт бўлгани учун Британияда миллий даража деган нарса бор, ўшанинг иккинчи ва учинчи босқичлари ўқиб тугатдим. Олган таҳсилим тажрибамни оширишга жуда ҳам катта ёрдам берди. Дейлик, кўп нарсаларни – Британия маҳаллий қонунларини Соғлиқни сақлаш тизимида қандай қўлланишини ўргандим, шу билан бир қаторда инглиз тилининг тиббиётга алоқадор бўлган томонларини жуда ҳам пухта эгаллашимга кўмак берди.
Би-би-си: Сиз, масалан, кечаётган йилдан бутунлай кўнглим тўлди, мамнунман, деб айта оласизми ёки йил охирида улгурмаган нарсаларим ҳам бўлди деган бир афсус, пушаймонингиз ҳам борми?
Энди, улгурмаган нарсаларим кўп. Талаба сифатида чуқурроқ ўрганишни хоҳлардим, лекин ҳам ишлаб, ҳам ўқиб бу нарсага улгуриб бўлмайди. Мисол учун, 2008 йилдан кўнглим тўлмаган тарафларидан бири – мамлакатдан, қариндош-уруғ, ота-она, ҳар доим уларга нисбатан соғинч туйғуси кўнглимнинг бир тарафини ғаш қилиб туради.
Би-би-си: Сиз мана таҳсил олиш билан бирга ишладим ҳам деяпсиз. Ишлаш жараёнида нималарга эришдингиз?
Британия Миллий Соғлиқни сақлаш тизимида, яъни касалхонада ишлайман. Ишлаш билан бир вақтнинг ўзида ўқиш қийин. Лекин ўқийдиганларга жуда ҳам катта қулайликлар яратилган. Мисол учун, Британия қонунларида белгилаб қўйилган, агар кимдир ўқиш билан бир вақтнинг ўзида ишлайдиган бўлса, бир ойда энг ками билан 5 соат иш жараёнидан вақт ажратиб берилади. Дейлик, ёзиш-чизиш, ўқитувчилари билан учрашиш, дарсга бориши учун, дейлик, ҳафтада 37.5 соат ишлашим керак бўлса, ўшандан ҳар ой 5 соатини хоҳлаган пайтим олишим мумкин.
Би-би-си: Йил якунланиб бораётган пайтда ҳар бир инсон келаётган йилга ўз ҳаётини муайян маънода режалаштиришга ҳаракат қилади. Умуман олганда сизнинг янги 2009 йилдан кутаётган умидларингиз қандай, янги йилга қилаётган режаларингиз қандай?
Яна ўша талаба нуқтаи назаридан гапирсам, ҳозир бир йиллик менежмент курсида ўқияпман. Унинг 50 фоиз пули Британия Миллий Соғлиқни сақлаш тизими томонидан тўланган. Бу курсни бошлашимга сабаб эса, аввалроқ шунақа ваканцияларга икки-уч маротаба ўрин бўлганда ариза ёзганимда, суҳбатдан ўта олмагандим. Ўшанда менга, “Сенинг Ўзбекистонда олган шифокорлик ёки бошқа дипломларинг бу – албатта, сенга плюс, лекин Британиянинг менежмент тизимидан сертификат ё-да дипломинг бўлиши керак,” дейишди. 2009 йилдаги режам ана шу таҳсилимни муваффақиятли тугатиб олиш. Кейин агар Худо насиб этса, ўша соғлиқни сақлаш тизимида бошқарув соҳасида ишламоқчиман.
Би-би-си: Энди 2009 йилда Ўзбекистон халқига, умуман ўзбекистонликларга нималарни тилаган бўлардингиз?
Ўзбекистонда яшаб турганларга, тўғриси, ҳавас қилардим. Чунки Янги йилни ўз мамлакати, ўзи туғилган жойда кутиб олиш – бу жуда ҳам катта бахт. Буни ҳеч нарса билан белгилаб бўлмайди. Мисол учун Оврўподами, Америкадами, қаерда яшашидан қатъиназар, барибир Янги йил кечасини ўз яқинларингиз, ота-онангиз бағрида кутиб олишни ҳеч нарса билан қиёслаб бўлмайди. Шу нуқтаи назардан мен уларга жуда ҳам ҳавас қиламан. Энди албатта, Ўзбекистон халқига, тенгдошларимга, ҳаммага яхши ниятлар, яхши тилаклар, авваламбор, соғлиқ-саломатлик тилаб қоламан.