 |
|---|
Жаноб Зардорий парламент ва тўрт маҳаллий кенгаш аъзоларининг 702 овозларидан аксариси, яъни 459 овозни қўлга киритишга муваффақ бўлди.
Умрининг аксар қисмини марҳум турмуш ўртоги Беназир Бҳутто соясида ва яна 11 йилини турли айбловлар билан қамокда ўтказган жаноб Зардорий учун президент этиб сайланиши оламшумул ютуқ.
Осиф Али Зардорий Бҳутто хонимнинг ўлимидан сўнг аввалига Покистон Халқ партияси устидан раҳбарликни қўлга олди. Бу партия парламент сайловларида муваффақиятга эришганидан кейин ҳукуматда ҳам қўли баланд кела бошлади. Лекин кўплар Покистонни бу каби қарама-қаршиликларга тўла инсон бошқаришидан хавотирдалар.
Ўтган йил Беназир Бҳуттонинг суиқасд оқибатида ўлдирилиши покистонликларни не қадар ҳайрат ва даҳшатга солган бўлса, унинг турмуш ўртоғи Осиф Али Зардорийнинг президент этиб сайланиши баъзиларни шу қадар ҳайрат ва ҳаттоки, даҳшатга солган бўлса эҳтимол.
Беназир Бхутто оиласини яқиндан билган сиёсий таҳлилчи Шавкат Маҳмуднинг айтишича, Зардорий қарама- қаршиликларга тўла одам.
«Сиёсий саҳнага кириб келганига 20 йилча бўлган бўлса, ҳамиша имижи ёмон бўлиб келган. Уни порахўрликка ғарқ бўлган ва ҳаттоки, бир маротаба қотилликка алоқадорликда айбланган одам сифатида кўрадилар. Бу айбловларнинг биронтаси маҳкамада ўз исботини топмаган, лекин бирон муддат бўлмаганки, унинг шахси атрофида гап-сўзлар юрмаган бўлса»,- дейди Шавкат Маҳмуд.
Осиф Али Зардорий президентлик учун курашни бу вазифа бўшаб қолгани учун бошлади. Ўтган ой истеъфога чиқишга мажбур бўлган собиқ президент Парвез Мушарраф Покистон жамиятини бирлаштира олмаган шасхлардан бири эди. Таҳлилчиларга кўра, жаноб Зардорий ҳам худди ана шундай сиёсатчи бўлиши турган гап.
Президентлик учун номзодини илгари сурганлардан бири Мушоҳид Ҳусайннинг фикрича эса, Зардорийнинг сайланиши билан Покистон яккаҳокимлик томон кетмоқда.
Кўпларнинг фикрича, жаноб Зардорий сиёсий зинапоя чўққисига фақатгина Бҳутто хонимнинг ўлими туфайли чиқиб қолди. Лекин жаноб Зардорийнинг балким сиёсий жиҳатдан улғайган бўлиши мумкинлигига ҳам ишонувчилар бор. Улардан бири сенатор Бабар Авон. Унга кўра, Зардорий ўқуви ўткир одам, тез сабоқ чиқариб, тез ўрганади, демократия, инсон ҳуқуқлари ва сиёсий озодликлар каби қадриятларга ишончи қатъий одам.
Жаноб Зардорий Покистон президенти этиб сайланар экан, мамлакат ядро қуролини ишга солувчи тугма устидан назорат унинг қўлида бўлади. Айни вақтда мамлакатни чўлғаб олаётган иқтисодий муаммолар ва Толибон исёнкорлари ҳужумлари масалаларини ҳам ҳал қилиши керак.
Американинг террорга қарши кураш талаблари, мамлакат аҳолиси ўртасида кенг тарқалган Америкага қарши ҳиссиётлар ва кўп-да мустақил ҳаракат қилувчи қуролли кучларни мувофиқлаштириш жаноб Зардорий учун энг мушкул вазифлардан бири булиши мумкин.
Парвез Мушарраф бунга эришиш учун роса ҳаракат қилди, аммо қўлидан келмади. Балким жаноб Зардорий бу йўлда муваффақиятлирок бўлар, лекин унинг ўтмишига назар солинса, Покистонни келажак бир неча оғир йиллар мобайнида бошқариш учун мос одам эканлигига исботларни топиш қийин.