 |
|---|
У киши билан бундан бир ҳафта олдин телефон орқали суҳбатлашган эдим. Суҳбат пайтида у киши ўз соғликларидан шикоят қилгандилар.
Муроджон акани қули гул пазанда, ўзбек миллий таомлари, жумладан сомса пиширишда уста эканликлари ҳақида жуда кўп кишидан эшитган эдим.
Маълум бўлишича, у киши кўплаб юртдошларимизни ўз бағирларига олиб, уларга устозлик қилганлар, сомса пишириш ва мижозлар билан муомала қилиш сирларини қунт билан ўргатган эканлар.Жуда кўп водийлик ёшлар Муроджон акани ўзларини устозлари деб билишади, у кишидан етарли моддий ва маънавий ёрдам олганликларини меҳр билан гапириб беришади.
Муроджон ака Украинага фарзандларини ҳам олиб келиб уларни ишга ўргатдилар ва яхши тарбиялаб вояга етказдилар.
Кейинги пайтларда қанд касалликлари зўрайиб, соғликлари оғирлашиб қолганига қарамай бозорда зиравор маҳсулотлар сотиб тирикчилик қилар ва рўзғор тебратар эканлар.
Мен Муроджон аканинг вафот этганлари ҳақидаги машъум хабарни эшитиб карахт аҳволга тушдим ва тезлик билан Европатиядаги танишларимга қўнғироқ қилдим. Улар марҳумни куни кеча ўз ватанлари – Ўзбекистонга олиб бориб дафн этилганини айтишди.
Муроджон ака Украинада муҳожиротда яшаётган кўплаб ўзбекларга холис хизмат қилиб келган эдилар. У кишининг хотираси ҳамиша қалбимизда сақланиб қолади.
Марҳумнинг оила аъзоларига ва яқинларига чин кўнгилдан чуқур таъзия изҳор қиламиз.
Жойингиз жаннатдан бўлсин, Тангри Сизга осмон шоҳлигини ато этган бўлсин, омин!
Бахтиёр Ҳасан, Украина.