 |
|---|
Дўслар, қайда – қайдасиз?
Яна қайта – қайта сўрайман –
Айтинг, қайда- қайдасиз?
Кунларимиз кунлардан баттар,
Юртда – хатар. Кўнгилда – хатар.
Ҳолингиздан тополмам хабар…
Дўстлар, қайда – қайдасиз?
Борлиғимни босади титроқ,
Юракларни юлади фироқ,
Фироқ йўли бунчалар йироқ…
Дўстлар, қайда – қайдасиз?
Сиз у ёнда – тиллари боғлиқ,
Биз бу ёнда – диллари доғлиқ,
Сўнгсизми бу зорлиқ, муштоғлиқ…
Дўстлар, қайда – қайдасиз?
Сафларимиз тортиб борар тор,
Билатуриб тортмадик ҳушёр,
Қичқираман балки сўнгги бор…
Айтинг, қайда – қайдасиз…
Дўстлар, қайда – қайдасиз?