Халқимиз яқингинада ўзбек ва қозоқ халқларининг абадий дўстлиги, жисплашуви, қардошлик алоқаларининг умрбоқийлигига ўзининг бебаҳо ҳиссасини қўшган ўғлони Сулаймон Бухорбоевдан айрилиб қолди.
Сулаймон Бухорбоев Ўзбекистон телерадиокомпаниясининг қозоқ редакциясида сермашаққат тележурналистиканинг кўп йиллик заҳматларини татиш баробарида ўзининг юксак даражадаги маънавий ва маърифий кўрсатувлари орқали ўзбек ва қозоқ халқлари ўртасидаги азалий дўстлик, қардошлик анъаналарининг чуқур илдиз отишида беминнат тер тўккан маърифатпарвар замондошларимиздан бири эди.
Шу маънода айтиш мумкинки, Сулаймон оға сермазмун ва ғоят фахрли умр йўлини босиб ўтди.
Афсуски, 2014 йилнинг 19 май куни шавфқатсиз ўлим Сулаймон Бухорбоевни орамиздан бевақт олиб кетди.
“Бирдамлик” Халқ Демократик Ҳаракати фаоллари Сулаймон Бухорбоевнинг вафоти муносабати билан отасининг муносиб издоши бўлган www.uznews.net сайтининг асосчиси ва бош муҳаррири, қонли Андижон воқеаларининг гувоҳи ва мазкур фожиалар юзасидаги асл ҳақиқатлар жарчиси бўлган таниқли ва иқтидорли журналист Галима Бухорбоева ва унинг оила аъзоларига чуқур ҳамдардлик изҳор қилади.
Халқимиз ўзининг Сулаймон оға каби зиёли, диёнатли ўғлонларини унутмайди, уларнинг хотиралари яқинлари, дўстлари, ҳамкасблари хотирасида ҳали узоқ яшайди.
Илоҳим, марҳумнинг руҳи шод, охирати обод бўлсин, Оллоҳ ўз раҳматига олсин, гўрлари нурга тўлсин.
“Бирдамлик” Халқ Демократик Ҳаракати