Мен икки нафар фарзандини ёлғиз тарбиялаб келаётган ногирон журналист сифатида яшаш шароитимдан қийналиб Навоий вилоят ҳокими Эркин Турдимовнинг қабулига кўмак сўраб кирдиму инсонийлик қиёфасини йўқотган бу шахснинг аёллик шаънимни кўпчиликни олдида тахқирлашини эшитиб чиқдим.
Шу кўйи исёнкор журналист сифатида жазоланиб, фарзандларим билан беш йилдирки очликка маҳкум этилдим. Вилоятдан иш берилмагач, жисмоний меҳнатга ярамайдиган ногирон журналист болаларини отасиз қай йўл билан боқиши керак? Журналистга қалам хақи тўлаш унут бўлиб кетган.
Хуллас, хокимнинг тайзиқи ҳам тўхтамади. Хуқуқларим ҳар томондан поймол қилинаётган кезларида ҳамкасбларимдан бири журналистни хақ танқидини чоп этиши мумкин бўлган сайтда ишлашни таклиф қилиб қолди. Ҳақиқий журналистнинг азалий орзуси ҳақ гапларини эълон қила билиш. Бу таклифни эшитгач, жон деб рози бўлгандим.
Навоий Вилоят Ички ишлар бошқармаси Жиноят қидирув бошқармаси бошлиғи Зоҳид Уроқов айтганидек арзимас маош эвазига бола боқаётган ногирон журналист учун моддий манфаатдорлик ҳам керак. Ҳар ҳолда журналист учун ИИБ ходимлари каби миллиондан тепадаги маош бир туш бўлса….
Хуллас, “Бирдамлик” ХДҲнинг Навоий вилоят бўлимига ихтиёрий равишда 8 ой етакчилик қилдим. Шунда Навоий вилоят Хавфсизлик хизмати бошқармасининг Баходир исмли бошлиқ ўринбосари собиқ “Бирдамлик”чи Самандарова Нодира опани менга “совчи” қилиб жўнатди. ВА МХХ ходими Нодира опа Самандарова орқали агарда ҳаракат сафидан чиқсам маоши етарли иш билан таъминланишимни ваъда қилишди.
Ҳали айтганимдек, ўзи бир ногиронман. Отасиз болаларим биргина менинг қўлимга қараб қолишган. Уларни ўйлаганлигим учун ҳам ўтган йилнинг июл ойидан ҳаракат сафидан чиқишга мажбур бўлдим.
Бироқ, худди шуни кутиб туришгандек, аксига олиб, Сентябр ойидан туман ИИБда мени устимдан интернетда ёритилган мақолаларим юзасидан тергов бошланди. Ноябр ойига келиб эса фитна уюштирилиб қастдан уч ойлик иш хақларим ушлаб қолинди ва энг ёмони яна ноҳақ ишдан четлаштирилдим. Шу кўйи фарзандларим ҳам коллежга қатнай олмай уйда қолиб кетди.
Шу йилнинг январ ойида хуқуқларим поймолэтилганлиги хусусида “Бирдамлик” сайтида мақола беришга мажбур бўлдим. Бундан хабар топган Баҳодир Чориев мен билан телефон орқали боғланиб ҳол сўради ва менга фаол сифатида эркин ижодни таклиф қиларкан, фарзандларимнинг оч қолмаслиги учун улар ҳар ой имкон даражасида менга “моддий кўмак” беришини маълум қилди.
Ваҳоланки, мана 6 ойдан бери фарзандларимнинг оч-яланғоч қолиши, ҳатто йўлкира топаолмаётганлигим сабабли болаларимнинг коллежга ўқишга қатнашдан ҳам маҳрум эканлиги ҳеч бир ҳукуматнинг ғамғўр вакилини қизиқтирмаган эди.
Хуллас, шу йилнинг 27 апрель куни мен қизим билан “Бирдамлик” Қурилтойида иштирок этиш учун Тошкент сафарига отлангандик. Аммо вилоят ИИБ ЖКБ бошлиғи Зоҳид Уроқов бизни Самарқанд ДАН постидан тутиб келишди. Ва ИИБ биносида қизим билан мени ноқонуний тарзда бир суткадан ортиқ тутиб туришди.
Мени ишдан ҳайдатишга муяссар бўлган Навоий вилоят МХХ ходимлари ва ИИБ ЖКБ бошлиғи Зоҳид Уроқовлар ғамхўр ҳукумат қилиши керак бўлган ишни ўз зиммасига олгани учун, яъни, етим-есирни бошини силагани учун “Бирдамлик” Халқ Демократик Ҳаракати раҳбари Баҳодир Чориевга нисбатан турли бўхтонлар уюштиришни, туҳматларга йўғрилган аризалар ёзиб беришимни мендан талаб қилишди.
МХХ ва ИИБ ходимлари бизни ғайриқонуний ушлаб туриш давомида «Чориев мендан Ўзбекистон Республикаси шаънига тўғри келмайдиган, Ўзбекистон ҳукуматига нисбатан туҳмат ва иғводан, ёлғондан иборат бўлган хабарларни ёзиб жўнатасан деб пул билан алдаб мажбурлаяпти» деб ёзиб берасан дея менга руҳий тайзиқ ўтказишди ва менга ўзлари истаганларидек номаъқбул ариза ёзиб беришга мажбурлашди. Бироқ мен бунингдек туҳмат гапларни ёзишдан қатъий бош тортдим. Ана шундай кейин ИИБ ва МХХ ходимлари мендан “Бирдамлик” ҲДҲ сафидан чиқиш ҳусусида мажбуран ариза ёздириб олишди. Чорасиз бўлганлигим учун ҳам МХХ ва ИИБ ходимларига “Бирдамлик” сафини тарк этганлигим ҳақида ариза ёзиб беришга мажбур бўлдим.
Бундан мақсад етим-есирни очликдан ўлдириш бўлса керак-да!
Аслида, ИИБ ходими Зоҳид Уроқов мени тасодифий ўлим билан қўрқитган эди.
Жон билан ризқни берувчи ҳам узувчи ҳам ягона Оллоҳ эканлигини билганлигим, қолаверса, хақталабликнинг шиддатли жангларида соғлиғим адо бўлиб, уларга ўлимга ҳам тайерлигимни билдиргандим.
Натижада, ҳали вояга етмаган қизимни, “Бирдамлик” ҲДҲ Қурилтойида иштирок этиш учун АҚШга таклиф этилган Камола Суннатовага нисбатан шу йилнинг 22 феврал куни қастдан автоҳалокат содир этилди. Қизимни машина уриб кетди. Унинг оёғи узоқ вақт гипсда қолди.
Автоҳалокат юзасидан бўлиб ўтган суд эса биздан яшринча тарзда ўтказилди ва ҳайдловчига нисбатан ҳеч қандай жазо чораси қўлланилмади. Жиноятчи ҳатто қизимнинг соғайиши учун тиббий харажатларни ҳам кўтарган эмас.
Ёш қизалоғим фалокатга учраганлиги сабаб, фожиали воқеа билан ўралашиб қолиб, бу кулфатларим хусусида сайтга хабар ҳам бера олмагандим…
Мени қизим билан шу йилнинг 27 апрел куни Самарқанд ДАН постидан тутиб кетишди ва бир сутка ёғоч устида оч наҳор ўтириб чиқишга мажбур этишди.
Натижада, яқингинада автоҳалокатга учраган қизимнинг дарди қайта қўзғаб, шамоллаб қолди. Менинг ҳам тобим қочиб қолди. Бироқ бунинг учун ИИБ ва МХХ ходимлари қонун олдида жавоб бермасликлари аниқ.
Чунки вилоят ИИБ ЖКБ бошлиғи Зоҳид Уроқовнинг менга қарата «Республикага ёзасанми, БМТга ёзасанми, хатинг айланиб-айланиб яна ўзимнинг қўлимга келади. Ишингни кўриш яна ўзимга қолади! Ишингдан қандай четлаштирган бўлсам, буёғига ҳолингни бундан ҳам хароб қиламан! Осмон менинг қўлимда, ҳақиқат излаб хомтама бўлма!» деб руҳий босим ўтказиб дод солиб чиранишларини қандай тушиниш мумкин?
Очиғи, 28 март куни унинг қабулида бўлдим. Навоий вилоят ИИБ ЖҚБ бошлиғи Зоҳид Ўроқовнинг «Ишинга қайта тиклаб, зарарингни қоплатиб бераман» деган сохта ваъдасига ишониб, 15 кун шикоят ёзишдан тийилгандим.
Аммо тўртта эркак прокурорлар: Келдибой Жусипбеков, Баҳриддин Аҳмедов, Шерзод Каримов ва Баҳодир деганларининг сохта келишув ваъдасига ишониб 1 апрел куни ишга чиқдиму соат 8.00дан 12.00гача хизмат хонамда иш билан машғул бўлдим, холос. Бироқ шу соатда оператор йигит орқали қўлимга 26 март куни ишдан бўшатилганлигим тўғрисидаги буйруқ тутқазилди. Бу эса куч ишлатар тизимларнинг янгича уйин ва фитналари эди.
Шу куйи яна сарсонгарчилик яна идорама идора юришлар бошланди. Вилоят прокуратурасининг эшиклари мен учун тақа- тақ бекилганидан сўнг яна 15 апрел куни республика прокурори қабулига боришга мажбур бўлдим. Буни қарангки бу гал фуқароларни қабул қилувчи масъул шахс Отабек Шойимов ҳаттоки аризаларимни олиб қолишни ҳам истамади. Тўғридан-тўғри Навоий вилоят прокуратурасига телефон қилиб вилоят фуқароларини қабул қилувчи масъул Фахриддин Турдиев билан суҳбатлашиб, мени алоҳида қабул қилишини ногирон ёлғиз она сифатида ишга қайта тикланишимни таъминлашини ва фарзандларим коллежга ўқиши учун шароит яратилишини хуллас барча муаммолар юзасидан бевосита вилоятни ўзида ечим топилишини сўраб, мени унинг қабулига жўнатди. Жумладан, аризамда кўрсатилган 65 ёшли Одил Хотамовни ўзини ишдан бўшатиш кераклигини, коллеж маълумотига эга сохта мухбир Умид Худойқуловнинг жавобини бериш кераклиги мен мутахассис сифатида у ерда ишлашим лозимлигини уқтирди.
Шунда Республика прокуратураси ходимидан сарсонликдан тўйганимдан вилоятдаги ўйинлардан чарчаганимни, улар яна мени калака қилишса нима қилишим кераклигини сўрадим. У эса 8371 233-43-58 рақамини ёзиб бериб, ўша ерни ўзиданоқ у билан боғланиб натижаситни айтишимни билдирди. Буни қарангки, гарчи бирорта аризамни қабул қилмаган бўлса-да, осмонларга учиб яна вилоятга қайтдим. Аммо яна ўша эски тос, эски ҳаммом. Яъни Фахриддин Турдиев мени яна Баҳриддин Аҳмедов ва Шавкат Ғапапоровларга учраштирибгина қўйди холос. Чернобил ногирони бўлган акам Худойназаров Олимнинг хайдовчилик гувохномасининг нохақ олиб қўйилганлиги тўғрисидаги мурожаат 16-бўлим бошлиғи Ашраф акани ҳам қизиқтирмади. Очиғи хар гал қониқарсиз натижани Отабек Шойимов ҳам эшитавериб чарчадими охири вилоят прокуратураси менинг муаммоларим билан шуғулланмаяпти, деб шикоят ташланг бизга, дея қутилди. Мен яна телеграмма шаклида ариза ташладим. Буёғига воқеалар яна ит итни сўрамайдиган алфозда давом этмоқда. Менинг шикоят аризаларимни ўқиб келаётган ҳукуматнинг мақсади нима? 2 нафар фарзанди билан бир ногирон бева аёлни очликдан ўлдиришми ва ёки Россия каби чет мамлакатлардан иш излаб чиқиб кетишга мажбур этишми?