Ислом Каримов маърузасидаги “2013 йил давомида 100 мингга яқин ишчи ўринлари бунёд этилди!” деган рақамлар қаердан бунёд бўлди экан-а?” деманг, ҳайрону лол бўлманг…..
Ўзбекистондек диёримизда ишсизликни бартараф этишнинг турли антиқа усуллари ўйлаб топиляпти.
Уйингизда мол боқяпсизми, рўйхатдан ўтиб, маълум миқдорда давлатга пул тўласангиз, бўлди – ишли бўлдингиз-қолдингиз-да! Дарҳол сизга меҳнат дафтарчаси, пенсия дафтарчаси очилади-қўяди!
Қарабсизки, кўз очиб юмгунча Сиз ишчилар рўйхатидасиз.
Ёхуд кафтдеккина хусусий томорқангизда деҳқончилик қиласизми, “Ишлик бойвучча” бўлишни истасангиз, зудлик билан рўйхатдан ўтиб қўйишни унута кўрманг! Ўша заҳотиёқ ишсизлар рўйхатидаги исм-шарифингизга чизиқ тортилади.
Оғилингизда молингизга ем бериб, томорқангизни чопиб, сабзи-пиёз экиб – Сиз қанча даромад оласиз? Бу “касбу-корингиз” билан тирикчилигингиз ўтадими? Топганингиз оила боқиш, боладарни ўқитиш, кийинтириб-едириш-ичиришга етадими? Рўзғор тебратиш қандай кечади? Бу ёғи ҳеч кимни қизиқтирмайди. Қолгани билан бирор зоғнинг дарди йўқ.
Ҳукумат учун муҳими шу: Сиз ишлисиз – “фалон нафар ишсиз фуқаро иш билан таъминланди” деган у-ууузун рўйхатлардан бирига тиргаксиз – тамом-вассалом!
Ҳа-я, дарвоқе, унутманг, Сиз ишлисиз. Сиз даромад қиляпсиз. Томорқангиздан олган даромадингиздан ҳукуматнинг ҳамёнига ҳам ҳадя қилиб қўйишни унутманг!
Мана энди Ислом Каримов маърузасидаги “2013 йил давомида 100 мингга яқин ишчи ўринлари бунёд этилди!” деган рақамлар қаердан ва қандай бунёд бўлганининг фаҳмига етдингизми?
Бизда, Ўзбекистонимизда шунақа-аааа!!!
Ойша РАҲМОН