АҚШнинг Ўзбекистондаги элчихонаси ходимлари томонидан ўзига хос ажойиб анъана йўлга қўйилган.
Америка Қўшма Штатлари элчихонасининг матбуот хизмати ходимлари томонидан ҳар ойда бир марта маҳаллий журналистлар учун “Пресс Гап” анжуманини ўтказиш йўлга қўйилган.
Элчихона саъий ҳаракталари билан ташкил этилаётган “Пресс Гап”лар шуниси билан эътиборлики, анъанавий тарзда узлуксиз ўтказиб келинаётган мазкур тадбир АҚШ ва Ўзбекистон ўртасида кўприк вазифасини ўтамоқда.
Яъниким, АҚШдан юртимизга ташриф буюраётган океан орти мамлакатининг шоиру адиблари, олиму фузалолалари, етук сиёсатчилар, қишлоқ хўжалиги, иқтисод, маориф, маданият, санъат соҳасининг энг машҳур, билимдон, етук мутахассислари билан маҳаллий журналистларимиз ўртасида бўлиб ўтаётган ҳар бир учрашув ва мулоқотлар савол-жавоб ва таассуротларга бой, ниҳоятда сермазмун кечмоқда.
Бунинг ортидан ҳамкасбларимиз онги, дунёқараши, Уммоннинг ҳув қирғоғида жойлашган сеҳрли диёр хусусидаги билим, тасаввурлари кенгайиб, бойиб бормоқдаки, қизиқарли учрашувларнинг самараси ўлароқ, америкача ҳаёт ҳақидаги тасаввур ва таассуротларини мақола шаклига келтирган журналистларимизнинг ижод намуналари кўмагида аксарият оддий аҳоли вакиллари ҳам “Яшил виза” нинг ватани бўлган АҚШга нисбатан қизиқишлари ортиб бормоқда.
Бугун, 2013 йилнинг 27 декбарь куни АҚШ элчихонаси навбатдаги ўз “Пресс Гап”ига маҳаллий журналистларни чорлади.
Мустақил журналистлар навбатдаги тадбирда АҚШ элчиси жаноб Джорж Крол билан учрашиш бахтига мушарраф бўлдилар…
2011 йилнинг 10 июнь куни Америка Қўшма Штатларининг Ўзбекистондаги элчиси сифатида қасамёд қилган Жорж Крол жаноблари маҳаллий журналистларни кириб келаётган янги йил билан самимий муборакбод этди.
Шунингдек, жаноб элчи йил давомида Ўзбекистон ва АҚШнинг сиёсий, иқтисодий, маданий алоқаларига тўхталаркан, келгусида юқорида номлари санаб ўтилган барча жабҳалардаги ҳамкорлик кўлами ортишига умид билдирди.
Учрашув қизғин савол-жавоб тарзида ўтди.
Маҳаллий журналистлар ўзларини қизиқтирган барча жабҳаларга оид саволларга Жорж Крол жаноблари томонидан берилган жавоблардан қониқиш ҳосил қилишди.
“Бирдамлик” Халқ Демокрнатик Ҳаракати Ўзбекистон бўлими Матбуот Хизмати
