Шимолий Корея 19 май, якшанба куни ўзининг шарқий соҳилидан қисқа масофаларга мўлжалланган ракетани учирди. Бу ҳақда, Жанубий Корея мудофаа вазирлигига асосланиб, Agence France-Presse ахборот агентлиги хабар бермоқда. Бу сўнгги икки кун ичида КХДР томонидан тўртинчи марта шундай ракетанинг учирилишидир.
Шанба куни ўша шарқий соҳилдан яна учта қисқа масофалардаги нишонларга зарба беришга мўлжалланган ракета учирилган ва уларнинг барчаси Япон денгизига қулаган эди. Ушбу воқеалар юзасидан фикр билдираркан: «Шимол кечаги каби бошқариладиган ракеталарни учиришдек иғвогарона ҳаракатларни тўхтатмаётганидан жуда ҳам афсусдамиз», – деди Жанубий Корея бирлашиш вазирлиги вакили.
Шанба куни учирилган ракеталарнинг қандай типга оид эканлиги маълум эмас. Аввалроқ, 2013 йилнинг апрель ойи охиригача расмий Пхеньян шарқий соҳилдан ўрта масофаларга мўлжалланган «Мусудан» ракеталарини учиришни режалаштираётган эди, бироқ кейинчалик ракета установкалари парвоз майдончаларидан олинди. Жанубий Корея мудофаа вазирлиги шанба куни тарқатган ахборотга кўра, Шимолий Корея ҳозирги кунда қисқа масофаларга мўлжалланган ракеталарни синовдан ўтказмоқда.Сўнгги бир неча ойдан бери, бир томондан Пхеньяннинг ядровий қуролни синовдан ўтказиши ва ракетани космосга олиб чиқиши, иккинчи томондан – Жанубий Корея ҳамда АҚШнинг кенг миқёсли ҳарбий машғулотлари сабаб Корея ярим оролида юзага келган кескинлик юмшамаяпти. Янги ракета парвозлари расмий Сеулни ҳам, расмий Вашингтонни ҳам хавотирга солмоқда: май ойи ўрталарида АҚШ мудофаа вазирлиги (Пентагон) КХДР ихтиёрида «Скад», «Нодон» ва «Мусудан» ракеталари учун мўлжалланган 200тагача мобил парвоз установкалари мавжул эканлигини маълум қилган эди.
kun.uz