Бугунги кунда Ўзбекистонда аҳолига бир эмас, ўнлаб интернет провайдерлар хизмат кўрсатади.
Uzinfocom, UzNet, Tps, Sarkor Telecom, Sharq Telecom, Ars-inform, «Evo» ТМ («SUPER IMAX» ООО), «Comnet» ТМ («IPLUS» ООО) – эҳҳе, бу интернет провайдерларнинг номини санайверсангиз, адоғи йўқ.
Хўш, мазкур интернет провайдерларнинг хизмат кўрсатиш сифати қай даражада?
Худди мана шу саволга жавоб беришда тутақиб қолади киши.
Негаки, Ўзбекистонда ишлаб чиқарилган маҳсулоти, жамики хизмат кўрсатиш соҳаларининг сифатсизлик даражаси ўлкадаги интернет провайдерларига ҳам мерос бўлиб қолган. Ишонаверинг.
Гапнинг индаллосини айтганда, мазкур интернет провайдерлари хизматидан фойдаланиш мижозлар учун, жайдари қилиб айтганда, асабнинг эгови.
Айниқса, Sarkor Telecom сифатсизлик бобида пешқадам. Sarkor Telecom хизматига мурожаат қилган фойдаланувчилар компьютер олдида интернетга улана олмасдан соатлаб сарғайиб ўтиришга мажбур.Хизмат сифатининг пастлиги етмагандек, уланишдаги муаммоларни бартараф этишда техник хизмат кўрсатиш тизими хизматидан фойдаланиш илинжида мабодо Sarkor Telecom га қўнғироқ қилгудек бўлсангиз тонг бўлса кун ботади, тун бўлса, тонг отади, лекин у ёқдагиларнинг бирортаси гўшакни кўтарай демайди.
Sharq Telecomга ҳам худди шунингдек “таъриф” бериш мумкин. Қўнғироқ қиласиз, соатлаб кутасиз, телефонингиз “ёниб” кетади ҳамки, Sharq Telecom операторлари бепарво, пашша қўриб ўтираверишади, афтидан.
Ucell ва Билайн (beeline) уяли алоқа компанияси модемларининг интернет хизмати тизимининг тутуруқсизлиги ҳақида-ку, гапирмай қўя қолайлик.
Кундузлари мазкур алоқа тармоқларининг модеми орқали интернетга уланиш ўлимдан қийин. Кун бўйи “антенани ушлаш” амри маҳол.
Нега шундай? Нима учун алоқа, компьютер, интернет тизимида “замонавий технологияларга эга” эканлиги иддао қилинаётган интернет провайдерларида хизмат кўрсатишнинг ҳоли бунчалар хароб? Нега?
Боиси бу борада малакали мутахассислар етишмаслигидами, ёки “дода” технологияларнинг камёблигидами? Ёхуд бориям чарчаб, “ҳолдан тойиб қолган”лигидами иллат?
Қайдам, эҳтимол, жамики интернет провайдерларидаги интернет хизматининг сифатсизлиги Ўзбекистон ҳукуматининг енг ичидаги ички сирли сиёсатларидан биридир балки. Оммани оламдан огоҳ бўлиш қулайлигидан маҳрум қилишнинг ўзгача бир усулидир бу балки, ким билсин?
Дилбар САИДОВА
“Бирдамлик” Халқ Демократик Ҳаракати
Ўзбекистон бўлими фаоли