Ўзбекистон Республикаси Конститутцияси қабул қилинганлигининг 20 йиллигини муносиб кутиб олишга аҳд қилган “Бирдамлик” Халқ Демократик ҳаракати Ўзбекистон бўлими фаолларига Ҳукумат томонидан тўрт томонлама тазйиқ бошланиб кетди.
– Мен фуқароларга тортиқ қилиш учун харид қилиш ниятида Пахтакор туман китоб дўконларини ҳам, Жиззах шаҳридаги китоб дўконларини ҳам хўўўп кездим. Бироқ сотувда бирорта ҳам Конcтитутция китобини кўрмадим, йўқ экан. Шу сабабли, Тошкентга буюртма қилишимга тўғри келди. Ҳаракатимизнинг пойтахтдаги “Ёшлар қаноти” бўлими етакчиси Зарнигор Ҳакимова менга йўловчи таксилар орқали Конститутция китобларини бериб юборишини айтди. Белгиланган вақтда “посилка”ни қабул қилиб олиш учун Тошкент-Самарқанд трассасига чиқдим. Китобларни қабул қилиб олиб, ортга қайтдим. Уйга киришим билан аввалига ўзимизнинг участка нозирларимиз “ҳолимдан хабар олгани” киришди. Бироз суҳбату савол-жавобдан кейин улар ортларига қайтишди, – дея хабар беради телефон орқали билаз билан бўлган суҳбатда “Бирдамлик” Халқ Демократик ҳаракати Жиззах вилоят бўлими етакчиси Саида Қурбонова, – Участка нозирлари кетгач, ҳаял ўтмасиданоқ, бугун, 5 декабрь куни тахминан соат 19.00ларда хонадонимга битта ИИБ формасидаги, битта фуқаро кийимидаги кишилар бостириб киришди. Улар ҳеч бир илтифотсиз ўзларини тўппа-тўғри ичкарига, уйнинг турига уришди. Фуқаро кийимидаги киши менга қараб:
– Саида Қурбоновамисиз? Сиз ўзи кимсиз?, – деб сўради нописандлик билан.
– Ҳа, мен Саида Қурбоноваман. Сизлар кимсизлар?, – сўрадим ҳайронлигим ошиб.
– Биз киммиз? Ўзимизни таништиришимиз керакми?, – ажабланди фуқаро кийимидаги кимса.
– Ҳа, қош қорайганда уйимга бостириб келдингиз, шунинг учун ҳам ўзингизни таништиришингиз, ҳужжатларингизни кўрсатишларингиз керак эмасми?, – дедим мулойимлик билан.
– Биз сизга ўзимизни таништиришимиз шарт эмас!, – деди “меҳмон”лардан бири ўта қўполлик билан жеркиб.
Улар мендан биргина исмимни сўрашди холос. Кейин уйимнинг ҳали у ёғига, ҳали бу ёғига нописандлик билан кўз югуртирганча, чиқиб кетишди. Аммо ортларига қайтишган эмас. Мана, эшигим тагида турган Жигули автомашинасининг ичида ҳамон ўтиришибди. Эшигимни кузатишмоқда. Уйимга кимлар кириб чиққанлиги билан қизиқишмоқда, – дея сўзига якун ясади Саида опа Қурбонова.
Аввалига Хоразм, кейин Наманган, мана, энди эса жиззахлик етакчимизнинг уйи куч ишлатар тизими ходамларининг қаттиқ назорати остида қолмоқда.
Айтингчи, бу ҳолат нимадан далолат беради?
“Бирдамлик” Халқ Демократик ҳаракати Жиззах вилоят матбуот хизмати.