Ассалому алайкум, Баҳодиржон!
Ишларингиз яхшими? Тан-жонингиз соғми? Оилангиз тинчми?
Баҳодиржон, бошимизга мусибат тушиб, Акромхўжа акангиз бевақт оламдан кўз юмганларида бизга жуда катта ёрдам қилдингиз. Биласиз, биз ўзбекларда жасадни ерга қўйишнинг ҳам ўзи бўлмайди. Йиғин-маърака дегандек… Шу кабиларга сиз томонингиздан берилган молиявий қўллов – кўмагингиз етмаган жойларига енг, ёқа бўлди, мушкилимни сон этди. Оғиримни енгил қилганингиз учун, Акромхўжа акангизнинг сизларнинг сафларингизда туриб, озми, кўпми қилган меҳнатларини инобатга олиб, хотирлаб, уларни иззатлаб, руҳларини шод қилганингиз учун, ортидан қолган мен муштипарга кўмак берганингиз учун сиздан миннадорман…
Бошимга тушган кутилмаган фожиа мени довдиратиб, ақлимни шошириб қўйганди.. Одамзод ҳамма нарсага бардош берар экан… Мана, вақт ўтиб, жудоликка кўника бошладим…Ва оғир пайтларда менга инсонийлик ёрдамини берган, далда бўлган одамларга ўз раҳматимни етказишни кўнглимга тугиб қўйгандим. Бугун эшитиб қолдим, сизнинг туғилган кунингиз экан. Шундай қувончли кунингиз миннаддорчилигимни билдириш учун энг қулай фурсат деб билдим. Шунинг учун сизга бир энлик ташаккурнома ёзсам дегандим.
Баҳодиржон!
Сиз узоқ элларда халқимизни деб, биз кабиларни деб жон куйдириб юрганингизни раҳматли Акромхўжа акангиздан кўп эшитганман.
Билдимки, жуда очиққўл, серҳиммат, саховатпеша инсон экансиз, отангизга раҳмат.
Туғлган кунингиз билан табрикларканман, сизга узоқ умр, бахту саодат, туганмас соғлик, битмас бойлик тилайман.
Халқимизнинг бахтига, оилангизнинг толеига ҳамиша соғ-омон, шод-хуррам бўлинг, юзларга кириб юринг, дунё тургунча туринг.
Тан-жонингиз соғ бўлсин.Сизни узоқдан-узоқ дуо қилиб қолувчи Янгийўллик опангиз Муҳаббат Муҳиддинова.