Ўзбекистон Президенти Ислом Каримов Хоразмга келиб кетганидан буён оёғи куйган товуқдек ҳар томонга йўрғалаётган Хива тумани ҳокими Даврон Аллақулиев пахта ҳосилини топшириш бўйича давлат буюртмаси уддаланган бўлса-да, қайтадан ҳаммани ва ҳатто қонунан таъқиқланган бўлишига қарамай, умумтаълим мактабларининг ўқувчиларини ҳам тўла-тўкис пахта теримига жалб қилди. У “Ҳамма пахта теримига” шиорини ўртага ташлаб, унинг амалда бажарилишини тўла таъминлашга уринмоқда.
Туман ҳокими мактабларнинг директорларига қуйидагича буйруқ берган: 2-5-синф ўқувчиларининг ҳар бири учун 5 килограммдан, юқори синф ўқувчиларининг ҳар бири учун эса 20 килограммдан, қаердан бўлса ҳам пахта топиб, териб топширасан. Бу буйруқни олган директорлар қўли остидаги ўқитувчиларни, ўқитувчилар эса ўқувчиларни сиқувга олдилар.
Бу ҳолатдан жиғийбийрон бўлган болалар уйида ота онасига хархаша қила бошладилар. Нима қилсин, кичкина бола пахта топмаса, ўқитувчидан дакки ёки таёқ ейди. Ота-оналар фарзандларига кўмак бериш учун бутун оилалари билан далага чиқдилар. Қайси фермернинг даласи эканлиги билан иши йўқ. Бешинчи синфдан паст фарзанди бўлса, 5 кило, ундан баланд фарзанди бўлса, 20 кило пахтани мактаб директорига олиб бориши керак, тамом вассалом. Тўпланган пахталар мактаб омборида сақланади.
Фермерлар бундай теримчиларни даладан ҳайдаш билан машғул. Ҳатто айримлари ҳар бирига 1000 сўмдан пул бериб, даладан чиқаришга уринганлар. Фермер пахтани заводга топшириб, ҳисоб рақамига пул тушириши ҳам кераклигидан мактаб директорлари ўқувчилар топширган пахтани қайтадан фермернинг ўзига пуллайдилар.
Валерий Назаров, “Бирдамлик”нинг Хоразм вилояти бўйича раиси.