Бугун 1 сентябрь, Мустақиллик байрами Куни. “Бирдамлик” Халқ Демократик Ҳаракати эълон қилган, тавбатдаги ОШ – Оммавий Шодлик акциясини кузатиш мақсадида (оқ кўйлак ва оқиш шим кийиб) кўчага чиқдим.
Кўча кўйлар ўта гавжум бўлса-да, байрамона кўринишда – озода, саришта, ранг-баранг байроқлар билан безатилган.
Бироқ бугун, ҳар кунгидан кўра оқ либос кийган одамлар кўзимга камроқ туюлди. “Бирдамлик”нинг тадбиридан вақтли хабар топган расмийлар, махалла ва қишлоқ фуқаролар йиғинларининг раисларини икки-уч кун муқаддам йиғиб, мажлислар ўтказишган эдилар. Ўшанда, тадбиримизга мумкин қадар кам одам қатнаштириш мақсадида, эликбошиларга кўрсатмалар берилган кўринади.
Бу албатта, таассуфли ҳол. Лекин қувонарли томони шуки, доим тим яшил форма кийиб юрувчи милиция ходимлари, тадбиримизни қўллаб-қувватлаб, бугун ишга ҳаммалари оппоқ кўйлакдарини кийиб чиқишибди. Уларга оқ форма шундоқ ярашган-ки, кўриб хавасинг келади!
Исмини айтишимизни истамаган, бир ходим билан, қисқача сухбат қуришга ҳам мушарраф бўлдик.
“Бирдамлик” мухбири (БМ): Савол: Ассалому алайкум, ака! Хорманг! “Бирдамлик” Ҳаракатининг бугунги Оммавий Тинчлик ва Шодлик тадбиридан Сиз ва сафдошларингиз ҳабардормисизлар?
Милиция ходими (МХ): Ва алайкум ассалом! Албатта хабардормиз! Нафақат бугунги, биз “Бирдамлик”нинг барча тадбирларидан ўз вақтида хабардор бўлиб, уларни олдини олиш учун, барча чораларни кўрамиз! Умуман бу саволингиз жуда қизиқ бўлди. Сизлардан биз хабардор бўлиб турмасак, бошқа яна ким хабардор бўлиши керак?
БМ: Узр, узр, ака! Айтингчи, бугунги тадбиримизга одамларни оқ устибошларда кўчага чиқишга чақирган эдик. Атрофда оқ қийинганлар ҳам бор, ранг-баранг кийинганлар ҳам бор. Лекин милиция ходимлари бугун ялпи оқ формада юришибди. Бунга сабаб нима? Ахир “Бирдамлик”нинг тадбирига қарши, доимий тўқ яшил формада чиқсаларингиз ҳам бўларди-ку?
МХ: Ҳа, бўларди. Лекин анови диндорларнинг ЎХҲ деган ҳаракатига нисбатан, сизларнинг ҳаракатингиз умум-эътироф демократик усуллар билан фаолият юргизмоқда. Сизларни ҳам унча суймасак ҳам, ЎХҲ мутаассибларига қарши, сизларнинг тадбиригнгизни атай қўллаб-қувватламоқчи бўлдик. Бундан ташқари, “Бирдамлик”нинг бу тадбири бизга жуда ёқди. Чунки, Ўрта Осиё биринчи милициясининг формаси оқ иштон ва оқ яктакдан иборат бўлган. Бу жихатдан ҳам биз “Бирдамлик”ка бирдамлик билдирмақчи бўлдик.
БМ: Э, раҳмат, ака! Соғ-саломат бўлинг! Байрамни яхши ўтказинг!
Бу, жорий Оммавий Шодлик акциясига оид Андижондан биринчи (ҳазил аралаш) репортажимиз. Суратда Ўрта Осиёнинг биринчи милицияси.
Биз билан қолинг.
Андижондан “Бирдамлик” учун С.Зайнобиддинов.
1 09 2012