Дўстдан бўлдими, душмандан бўлдими,ё бу (шахсан менинг фикру ожизимча) Ўзбекистонда фаолият олиб бораётган алоқа компаниялари ўртасидаги носоғлом рақобатнинг қитмир ўйини бўлдими, ҳартугул, МТС компаниясига омма тили билан айтганда “кўз тегди”.
МТС алоқа компаниясида қандай товламачилигу, фирибгарликлар бўлган, ё бўлмаган, албатта, бу масалага аниқлик киритиш қонун идоралари ходамларининг ҳукмига ҳавола. Бироқ, мен МТСнинг бир мижози сифатида шуни айтишим мумкинки, танлаган алоқа компаниямнинг хизматидан ҳамиша кўнглим тўлган, нолиган жойим бўлмаган.
Бироқ, Юсел алоқа компанияси хусусида оғзимни тўлдириб шу фикрни айта оламанми? Йўқ-да. Кимга қандай билмадиму, аммо, Юселнинг модеми орқали интернет билан боғланишга интилиш, бу компаниянинг телефон рақами орқали кимдир билан алоқа қилишга уриниш, очиғи, кишининг юрак-бағрини қон қилиб юборади, ишонаверинг.
Бошим айланиб, Юселнинг 3G МОДЕМини олганимга 7-8 ой бўлиб қолди-ёв. Аммо 8 соат ҳам фойдаланишга муваффақ бўлмадим, ҳисоби. Интерннетга уланиш учун соатлаб кутишга, бирор бир сайтни, ёхуд эл. почтангизни очиш учун кун бўйи кутиб ўтиришингизга тўғри келади.
Шу сабаб ҳам бу компаниядан олган модемни бир танишимга тортиқ қилиб юборгандим.
МТС “ёаилди”-ю, мен ҳам кўп қатори юсел хизматидан фойдаланишга мажбур бўлдим.
Алоқа шунчалар ёмонки, таърифлашга сўз ожиз.
Алоқасининг айнан мана шутарзда қониқарсизлиги туфайли ҳам Юсел компанияси ҳамиша мижозга муҳтож бўлган деб ҳисоблайман. Боиси, яқин-яқин кунларгача Юсел шахобчаларининг эшигига “На один номер +3” деган эълон осиғлик турарди. 15 кунлар чамаси илгари қизим Юселдан янги рақам харид қилди. 3 000 ( уч минг) сўмга нақд 3 та рақам тортиқ қилишаркан.
Буни қарангки, МТСда муаммолар вужудга келиб, “вақтинча ёпилиб” қолганидан кейин, Юсел алоқа компаниясининг куни туғди. МТСнинг рақамлари кечки соат 18.00 да ўчирилган кунининг эртасига иш билан кетаётсам, бир бино эшиги одамга чунонам тирбандки, кўриб лол қолдим.
– Нима гап? Бу ерда текин мол тарқатишаяптими? – сўрадим шеригимдан.
– Дунё бехабарсиз-а, ўртоқ?! МТС “ўлди”-ку?! Ҳамма Юселдан янги номер олиш учун очередга туришибди, – деди ҳамроҳим билағонлик қилиб.
Навбатда турган одамларни санаб, адоғига етиб бўлмайди. Нақд 500 нафардан ортиғ-ов, адашмасам. Хуллас, 3 кунлар давомида Юселнинг телефон рақамлари қўлма-қўл бўлиб кетди. Битта оддий рақамнинг нархи осмонга, аниқроғи, 18 000 – 20 000 сўмга чиқиб кетди. Бу ҳолдан илҳомланган Юсел компанияси бошқаруви иш кўламини кенгайтирди. Қўли-қўлига тегмаётган компания операторлари энди “круглосуточно” ишлашларига тўғри келди. Бешинчи кунга бориб, аниқроғи, турнақатор навбатда турган одамлар сони сийраклашгач, Юсел рақамларининг нархи 10 000 сўмга тушди. Айни дамда ҳам одамлар гавжум жойдаги Юсел шахобчаларида телефон рақамлари 10 000 сўмлик нархни “ушлаб” турибди. Оддий бир рақам 10 000 сўмга сотилмоқда. ( Аммо чек берай дейишмайди). Одамлар сийрак ҳудудлардаги шахобчалар эса битта телефон рақамини 5 000 сўмга пуллашмоқда. Гарчи алоқа компанияси шахобчалари эшиги олдида навбат кутиб турган одамлар сони сийраклашган бўлишига қарамасдан, ҳамон Юсел тармоғига уланиш учун талаб катта.
Очиғи, гап Юсел компанияси фурсатдан фойдаланиб, ўтмай қолган рақамларини неча пулга ўтқазишида эмас эмас, аслида. Ҳамма гап Юсел тизимидаги алоқа сифатининг ўта пастлигида, ниҳоятда қониқарсизлигида.
Биринчидан, мана, 15 кундирки, Юсел алоқа компаниясига уланганлар интернет орқали ўз «персональный кабинет» – шахсий кабинетларига кириш ҳуқуқидан маҳрум. Бу ҳам майли-я, Юсел мижозлари керакли рақамни бир теради, икки теради, токи қайта-қайта термас экан, алоқага киришишнинг, уланишнинг имкони бўлмайди. Шундай пайтларда асабларинг қақшаб кетади кишининг. Юселнинг модемини эса гапирмай қўяверинг! Юқорида айтганимдек, расво!
Айтмоқчи бўлганим, МТСнинг бошида қора булутлар айланмоқда, бу эса Юселга қўл келмоқда. Юсел компаниясининг қирол ва қироличалари бундай имкониятни ўзларига ўзлари қўлбола яратдиларми, ёки МТСнинг инқирозга юз тутиши, шунчаки Юселчиларга тақдирнинг қилган туҳфасими, билмадиму, аммо ягона истагим шуки, Юсел компанияси нонини ҳалоллаб еса, мижозларга наъмунали хизмат кўрсатса, МТС компаниясининг вақтинча ёпилиб қолганлигидан аросатда қолган одамларнинг ночорлигидан фойдаланиб, қаллоблик қилмаса, фуқароларнинг маблағини беҳуда емаса дейман.
Айни кунлар Юсел компанияси учун бир синов муддати, адашмасам. Юселчилар ўз номларини оқлаб, аҳолига наъмунали хизмат кўрсатиб, мижозлар ишончига киришлари учун бугунги кун энг қулай имконият. Акс ҳолда, ишонтириб айтаманки, МТС компанияси ўз қаддини ростлаб олган кунданоқ, бугун одамлар қай тарзда Юсел компанияси эшикларига оқиб келишган бўлса, эртага яна қайта МТСнинг эшикларини қоқишлари шубҳасиз. Чунки ҳамма ҳам наъмунали ва сифатли хизмат харидори. Мижоз эса ҳамиша ҳақ!
Малоҳат ЭШОНҚУЛОВА
“Бирадмлик” Халқ демократик ҳаракати Ўзбекистон бўлими етакчиси