Икки кундан бери сув келмайди. Одамлар табиий ариқлардан сув тошиб, тирикчилик қилишаяпди. Кўп қаватли уйлардаги ҳожатхоналар сасиб кетиб, турли касалликлар келиб чиқиши эҳтимоли бор. Бунинг устига уч кундан бери газ йўқ. Айтишларича, душанбагача бўлмас эмиш. Одамлар тўпланишиб, ўчоқларда овқат пиширишмоқдалар. Қишда свет ўчавериб, асабни бузган эди. Ёз келиб эса газ муаммоси юзага келди. Яқинда В. Путин Тошкентга келиб, газ масаласида Ўзбекистон билан тўрт ярим миллиард доллорлик келишувга имзо чекиб кетган эди. Лекин газ йўқлигининг сабаби бу бўлмаса керак. Чунки бундан олдин ҳам бундай ҳолатлар бўлиб турар эди. Энг асоссийси, бирор бир мутассадди чиқиб, газ етишмовчилигининг сабабларини халққа тушинтириб бермайди. Шу сабабдан одамлар ҳайрон. Ахир газимизни ўрислар сув текинга олиб кетган даврларда ҳам бундай муаммолар бўлмаган эди-ку?
Кеча қўшнимиз, иложсизликдан, электр энергияси билан ишловчи чой қайнатгичда суюқ овқат қилаётганда, қайнатгич портлаб кетиб, иссиқ овқат қорнига сачраб, фалокат рўй беришига оз қолди. Шу воқеа бўлганида, бунга ким жавоб берарди? Биз оддий фуқаро ўлароқ, катталаримизга мурожаат қиламиз: Бизларга мустақиллигимизнинг 21- йилигида нега газ муаммоси келиб чиқаётганини тушинтириб беринг? Биламан, сизлар танқидни ёқтирмайсизлар. Лекин бу сиёсий манфаатдан келиб чиқадиган танқид эмас. Бу – ҳақиқат. Ўйлайманки, юқоридаги саволларга жавоб олишга халқимизнинг ҳаққи бор.
Носир ЗОКИР
“Бирдамлик” халқ демократик ҳаракати Наманган ва Фарғона вилоятлари бўйича координатори