Тошкентнинг Мирзо Улуғбек туман маҳкамаси 12 июн куни қирғиз элчихонаси олдида рухсат этилмаган норозилик пикети ўтказишга уринган мухолифат фаолларини катта миқдордаги жаримага маҳкум этган.
«Бирдамлик» халқ ҳаракати фаоли Малоҳат Эшонқулованинг Би-би-сига маълум қилишича, пойтахт милициясининг Терроризмга қарши кураш бўлими терговчилари 8 соатдан кўпроқ давом этган тергов ниҳоясида фаолларни «ноқонуний пикет, юриш ва намойишлар ўтказиш»да айблашган.
Намойишчилар устидан кечки соат 8.30 да бошланган маҳкама 15 дақиқа давом этган.
Маҳкама уч нафар фаол-Малоҳат Эшонқулова, Саноат Абдураҳмонова ҳамда Сардор Ўроловларга энг кам иш ҳақининг 80 баробари ёки 5 ярим миллион сўм миқдорида жаримага солган.
Ҳибсга олинган фаолларнинг ҳимоячи билан таъминлаш ҳақидаги талаблари рад этилган.
Тошкент шаҳар ҳокимияти мухолифатчиларнинг намойиш ўтказишга рухсат бериш ҳақидаги сўровларини жавобсиз қолдирган.
‘Қирғиз элчихонаси ранжиган’
Мухолифатдаги «Бирдамлик» халқ ҳаракатининг 30 дан ортиқ фаоллари сешанба куни пойтахтдаги Қирғизистон элчихонаси яқинида намойиш ўтказиш учун йиғилган пайтлари кўп сонли фуқаро кийимидаги ходимлар томонидан ушлаб, олиб кетилган.
Малоҳат Эшонқулованинг айтишича, милиция қирғиз элчихонасидан бир неча юз чақирим узоқликда жойлашган Тошкент Ирригация институти олдида тўпланган намойишчиларни элчихона томон юришни бошлаган пайтлари ҳибсга олган.
Намойишчиларга шиорлар ёзилган плакатларни очишга ҳам изн берилмаган.
«Плакатларимизда «Ўзбек ва қирғиз миллатининг ўзаги бир», «Йўқолсин миллатчилик!», «Қирғизистонлик миллатдошларимизнинг ҳақ-ҳуқуқларини поймол этиш тўхтатилсин!», «Азимжон Асқаров озод этилсин!» каби шиорлар ёзилган эди», – дейди Малоҳат Эшонқулова.
Унинг сўзларига кўра, намойишга ўшлик жабр чеккан ўзбекларнинг вакиллари ҳам келишганди.
Милиция уларни ҳам ҳибсга олган, аммо кейинроқ қўйиб юборган.
Малоҳат Эшонқуловага кўра, амалга ошмаган намойиш иштирокчиларини ҳибсга олиш амалиётига бошчилик қилган милиция мулозими «қирғиз элчихонаси ўзбек фаолларининг норозилик амалиёти уюштириш режасидан ранжигани»ни айтган.
«Бирдамлик» фаоллари шунингдек Қирғизистон ҳукуматини «ўзбекларга қарши апартеид сиёсати»ни юритишда, Ўзбекистон ҳукуматини эса Қирғизистонда ўзбекларга нисбатан юритилаётган бу сиёсатга «бефарқлик»да айблаганлар.
Роппа-роса бир йил муқаддам Қирғизистон элчихонаси ўнгида Ўш ва Жалолобод шаҳарларида юз берган этник низоларни хотирлашга уринган 15 фаол ҳибсга олиниб, маъмурий жазога тортилганди.
Ўзбекистон ҳукумати 2010 йил июн воқеалари чоғида юз минглаб ўшлик ва жалолободлик қочқинларга вақтинчалик бошпана берган.
Президент Ислом Каримов юзлаб инсонларнинг умрига зомин бўлган қонли воқеалар юзасидан мустақил халқаро тергов ўтказишга чақирган.
Воқеаларда «учинчи кучлар»ни айблаган Ўзбекистон ҳукумати ҳодисалар билан боғлиқ хабарларни қаттиқ назорат қилиб келади.
Ўзбек матбуоти Қирғизистон жанубидаги қонли воқеаларнинг 2 йиллигини эсга олмаган.
http://www.bbc.co.uk/uzbek/uzbekistan/2012/06/120613_cy_tashkent_picket_audio.shtml