“Бирдамлик”нинг Хоразм вилояти фаоллари 12 июнь куни Қирғизистоннинг Ўзбекистондаги элчихонаси олдида уюштириладиган пикетга олдиндан пухта тайёргарлик кўриб, 10 июнь куни соат ўн олти-ю ўнда поездда Тошкентга йўл олишни мўлжаллаб, чипталарни сотиб олган эдилар. Лекин “Йўлимиз бехатар бўлсин” деб дуо ўқиб, эндигина вокзал сари йўлга тушганда “Бирдамлик” нинг Хоразм вилояти бўйича раиси Валерий Назаров билан рўй берган воқеа ва шерикларининг паспортлари ва йўл чипталари олиб қўйилиши ҳамма тайёргарликни бир пул қилди. Фаоллар пикетда қатнашиш тугул, Хоразмдан чиқиб кетолмади ҳам.
Валерий Назаровни бир тўда йигитлар воситасида одамларнинг кўзи олдида оёғини ерга теккизмай олиб кетилиши худди Габриэл Гарсия Маркеснинг “Ошкора қотиллик қиссаси” асаридан саҳна кўринишига ўхшаб туюлди. Ўзининг айтишича, Валерий акани кексалигига қарамай, дўппослаб, азоб беришган, ҳақоратлашган, паспорти ва чиптасини олиб қўйишган. Шерикларини ундан суриштиришган. Интернет саҳифаларида айрим жабрланувчиларнинг, ҳуқуқ-тартибот идоралари ходимлари мени ундай, қилди, урди, ҳақоратлади, деган гаплари эълон қилинганида кўпинча ўйлаб топилган ривоят деб ҳисоблар эдик. Энди кўз олдимизда содир қилинган воқеадан кейин уларнинг кўпчилиги ҳақиқат эканига амин бўлдик.
ДОВУД СУЛАЙМОН