Фарғона вилояти, Олтиариқ туманида истиқомат қилувчи 15 ёшли тўғма ногирон қизалоқ жарроҳларнинг таъмагирли туфайли бир умр тушакка михланадиган, дилбандининг барча болалар каби югургилаб юришини орзу қилган ота-онанинг орзулари эса армонга айланадиган бўлди.
Гап шундаки, қизалоғининг умуртқа пағонасини операция қилдириш мақсадида Республика тромотология-ортопидия институтининг ўсмирлар ортопедияси бўлимига “ордер” олиш илинжида Фарғона вилоят Соғлиқни сақлаш бошқармасига қатнай-қатнай онаизорнинг бир эмас, иккита пойабзали титилиб кетди. Шукурки, пойабзал пошналарининг заволи бесамар кетмади. Самондек сарғайганлари, кута-кута ўтказган кунлари, ойлари эвазига “ордер”ни қўлга киритган она гуё шу билан барча дардлари аригандек, жамики муаммоси ҳал бўлгандек, қизалоғи оёққа туриб кетгандек юраги қувончдан нақд ёрилаёзганди…. Бироқ… Бор машмаша ногирон қизчани Тошкентга, Республика тромотология-ортопидия институтининг ўсмирлар ортопедияси бўлимига олиб келишганларидан кейин бошланди.
Илтий текшириш институти каттаси Азизовмиди-ей, Азимовмиди-ей, хуллас, директори қизалоқнинг умиртқа поғонасида жарроҳлик амалиётини ўтказиш пуллик эканлигини таъкидларкан, жигарбандининг ҳасратида тутдек тўкилиб турган ота-онага давлат ғазнасига нақд 3500 000 (уч миллон беш юз) минг сўм тўлаш зарурлигини ўқтирди. Иш шу билан ҳал бўла қолса қани эди. Йўқ-да. Юқорида келтирилган сўммма – бу, ҳали айтганимиздек, давлат ғазнасига тўланиши керак бўлган маблағ. Аммо “қўл ҳақи” берилмаса, шифокорларнинг қўллари ишга бормасмиш. Мазкур илмий-текшириш институти ўсмирлар ортопедияси бўлими жарроҳи Илҳом Хўжаназаровнинг ногирон қизчанинг ота-онасига қарата айтган лутфига кўра, 1 000000 (бир миллон) сўм миқдорида қўлга нақд тутқазиладиган соққа, “қассоблар”нинг, йўғ-э, жарроҳларнинг “илҳоми”ни келтирармиш.
Тошкентга бор-кел, ижарага бер, тамадди қил, ғазнани тўлдир, шифокорни рози қил… ларнинг барига кетадиган харажатнинг ўзи 5 000000 (беш миллон) сўмдан ошиб турибди-да! Беш миллон-а? Шунча маблағ деҳқон деганида нима қилсин?! Агар бўлганидами, фарзандининг соғлиғи, бахти учун бу “беш”лардан бештасини тортиқ қилишмасмиди?!
Алал оқибат, ночор қолган ота-она ногирон қизалоқларини олиб, Фарғонага ноумид бўлиб қайтишга мажбур бўлишди….
Ўзбекистонда ногирон болаларга кўрсатилаётган “ҳиммат” мана шу тақлидда, агар билсангиз…
Ҳолис ХОН
Мустақил журналист