Тошкент шаҳрида ҳар ҳафтада нашр этилаётган “Кросс” деб аталувчи газета ижодкорлари: “Аҳмaқона қонунлар” деган рукн очишган. Ушбу рукнда АҚШ ва бошқа ривожланган мамлакатларнинг турли соҳаларга оид қонунларнинг моддалардан келтирилган.
Қани кўрайлик-чи, ҳақиқатда ҳам ривожланган мамлакатларда аҳмақона қонунлар ишлаб чиқаришармикин?
1. “ АҚШнинг Небраска штатида черковдаги ибодат чоғида болангизни ҳиқичоқ тутса, қамоққа олинасиз”
Америкада ҳар бир дин вакилларининг ҳуқуқлари қандайдир қонунлар билан челанмасдан, аксинча, эркин ибодат қилишлари учун кенг имкониятлар яратилган. Сиз черковга борар экансиз уни муқаддас деб билишингиз лозим. Фарзандингизни олиб борсангиз у ҳар томонлама ибодатга тайёр бўлиши керак. Тушинмасдан атрофдагиларга ҳалақит бермаслиги керак. Шундай тартиб ўрнатиш учун чиқарилган қонунни қандай қилиб аҳмақона қонун деб бўлади? Улар биздагига ўхшаб масжидга кириб олишиб иғвогарлик ёҳуд ўғирлик билан шуғулланишмайди ё раҳбарларга ҳамду санолар ўқишмайди. Черков ва масжидларда давлат миқиёсидаги масалалар ҳам муҳокама қилиниши мумкин.
2. “АҚШнинг Пенсильвания шаҳрида бир уйда ўн олтита аёлнинг истиқомат қилиши таъқиқланади. Лекин бир юз йигирмата эркак биргаликда бемалол яшай олишади”
Бу қонун бизнингча аёл ва эркакларнинг характеридан келиб чиқиб қабул қилинган бўлса керак.
Биласиз-ки, ҳатто ўзимизда ҳам бир неча аёллар йиғилиб қолишса, нима билан шуғулланишади-ю, бир неча эракалар бир жойга тўпланиб қолишса нима билан шуғулланишади? Фикрларимнинг мазмунини тушунган бўлсангиз керак.
3. “Францияда ўз чўчқасини “Напалеон” деб атаган одам қамоққа олинади”
Чунки улар ўзларининг ватанларини равнақи учун курашганларни эъзозлашади. Биз улуғ соҳибқиронимиз Амур Темурни ўрислар қарайиб юз йил давомида жаллод деб атасалар ҳам пинагимизни бузмадик. Аксинча, уларни ноғорасига ўйнаб, ҳақиқий жаллод Ленинни “бобомиз” деб атаб келдик. Ҳатто ҳозир ҳам Жериновскийга ўхшаганлар ўзбек халқини қўй, балиқ деб атаса ҳам, унга жавоб қайтариш ўрнига унинг сўзларини бир-биримизга такрорлаб кулиб юрибмиз. Кимни устидан кулаяпмиз?! Тўғри, халқимиз сиёсий томондан руслардек фаол эмас. Бу ҳаммамизни ташвишга солади. Лекин бу дегани миллатимиз устидан, собиқ империячиларни кулишига бемалол йўл қўйиб беравериш керак дегани эмас-ку?! Миллий ғурур деган туйғу қолганми бизда, ўзи?
Яна “Кросс” газетасидаги укаларимизга ўхшаганлар ривожланган мамлакатлардаги қонунлар устидан кулиб ҳам қўйишади! Ривожланган мамлакатларда фуқароларнинг ҳуқуқларининг ипидан- игнасигача қонунлаштириб қўйилган. Бизда ҳам аллақачон шундай бўлиши керак эди. Ҳуллас, сиёсий-ижтимоий тизим бўйича, биздан юқори турувчи ривожланган мамлакатларнинг қонунларини “аҳмақона” деб атайдиган одамлар олдин ўзларига бир боқсинлар-да, сўнгра ноғара чалсинлар! Ким аҳмоқ?!
Носир Зокир.