Жиззах вилоятининг Пахтакор, Дўстлик, Мирзачўл, Арнасой туманлари билан боғловчи катта йўл серқатнов йуллардан бири. Шу йўлга чиқиб олган йўловчи истаган манзилига бир, бир ярим соат кечикиб бўлса-да, етиб олиши тайин.
Серқатнов бўлса, таксилар бисёр бўлса нима учун кечикишади дейсизми? Таксилардан шикоят йўқ. Бироз қиммат юришини ҳисобга олмаса, хизмати яхши. Баъзан йўловчилар ҳайдовчилар билан нархини тортишиб қолишади. Шунда ҳайдовчилар “Ака, (ёки ука, опа, она) йўлнинг қандайлигини ўзингиз билансиз-ку? Машинани чарчатиб ташлайди”, деб нолишади.
Дарҳақиқат, шундай. Йўллар шу қадар бузилиб кетганки, машиналар йўл қолиб, четдан юришга мажбур бўлишади. Ҳар йили ремонт қилишади. Йўл ўртасидаги чуқурларни тупроқ аралаш қум билан ёпиб қўйишади. Номигагина қилинган бу ремонт бир ойга ҳам етмайди. Йўл яна илгариги ҳолига келиб қолади. Автобусга ёки таксига утиргудек бўлса, то манзилга етгунига қадар лук-лук этиб азборойи силкинганидан, ичаги узилиб кетади кишининг. Ҳайдовчилар эса автомашина ғилдираклари ҳар чуқурга тушган пайтда, жони оғриган кишидек «Ваҳ» деб қўйишади.
Шу кунларда ҳайдовчиларнинг қувончлари чексиз. Сабаби, Жиззах вилоятининг қатор туманлар билан боғловчи бу серқатнов йўлда таъмирлаш ишлари бошланди.
Ҳайловчилар ва йўловчилар йўл қурувчиларига инсоф тилаб туришибди. Ишқилиб вақт ва маблағ сарфлаб таъмирланган йўл тезироқ таъмирдан чиқиб, ҳайдовчи ва йуловчиларга узоқ йиллар хизмат қилсин-да.
Саида ҚУРБОНОВА
“Бирдамлик” Халқ демократик ҳаракати Жиззах вилоят бўлими раҳбари