- 2010 йил
Ўзбекистондаги амалдаги Ҳукумат томонидан амалга оширилаётган зўравонлик, айтиш мумкинки, ваҳшийлик ҳатто ҳорижлик ҳамюртларимизни ҳам бефарқ қолдирмаётир. Бугунги кунда айнан Каримов режимининг адолатсизлиги, ноҳақликка қурилган зўравонлиги туфайли Ватандан олисда яшашга маҳкум бўлаётган, кўксини юрт соғинчи ўртаётган ватандошларимиз Ўзбекистонда истиқомат қилаётган ҳамюртлари тақдиридан хавотирда, алам ва изтиробда.
Қийноқлар исканжасида умргузорлик қилаётган юртдошларининг ҳаёти, келажагидан қайғу чекаётган ҳорижлик ватандошларимизни ўзбек халқига бўлган меҳр, ҳамдардлик ҳисси амалий иш қилишга, оёққа қалқишга ундамоқда.
16 апрель куни АҚШнинг Ўзбекистон элчихонаси биноси олдида бўлиб ўтиши режалаштирилаётган навбатдаги пикет ҳам Ўзбекистонда ҳукм сураётган адолатсизликларни бартараф этишга қаратилган.
Қашқадарё вилоятининг Шаҳрисабз туманида истиқомат қилувчи Ҳасан бобо Чориевнинг Ўзбекистон ҳукуматининг ҳақсизлигидан безиб, АҚШдан сиёсий бошпана олган фарзандлари бўлажак пикет ташкилотчилари ҳисобланади.
16 апрель куни эрталаб соат 8-00 да бошланиши мўлжалланган пикетда Ҳасан бобонинг АҚШда қўним топган етти нафар ўғиллари, келину набиралари, жами, 30 нафардан ортиқ фуқаро иштирок этиши кутилмоқда.
Чориевлар сулоласи вакиллари АҚШнинг Ўзбекистон элчихонаси биноси олдида Каримов режимининг ноқаҳликларига қарши ўз исёнларини тинчлик йўли билан ўтказиладиган пикет орқали изҳор қилиш истагида.
Мазкур пикетда “Каримов режимининг қамоқхоналарида жабр чекаётган барча сиёсий маҳбуслар озод этилсин!”, “Ўзбекистонда порахўрликка, инсон ҳуқуқларининг топталишига барҳам берилсин!”, “Президент Каримов истеъфо берсин!”, “Қашқадарёнинг Шаҳрисабз туманида истиқомат қилаётган 70 ёшли отамиз Ҳасан Чориевдан зўрлик ва куч ишлатиш йўли билан ноқонуний тарзда тортиб олинган мол-мулки ўз эгасига қайтарилсин!” деган каби қатъий талаблар илгари сурилади.
Шунингдек, Чориевлар оиласининг АҚШдаги вакиллари Ўзбекистон фуқароларининг тақдиридан ташвиш чекаётган, жон куйдираётган барча юртдошларини ўз сафларини тўлдиришга, пикетда иштирок этишга, якдил ва бирдам бўлишга чақиради.
Иштирок этиш истагидаги барча Ватандошларини 16 апрель куни АҚШнинг Ўзбекистон элчихонаси биноси олдида кутиб қолади.
АҚШда истиқомат қилувчи Чориевлар оиласи вакиллари