Хайрият, 10 кунлардан буён қишлоғимизда электр токи ўчирилмаяпти. Бирок, севинчимиз узоққа бормаяпти. Чунки бизнинг қишлоқдаги электр токи симёғочига ит пешобини тўкиб кетса ҳам электр токи узилиб қолади. Сабабини сўрасак, электр трансформаторлари эскирган. Қишлоқ очилган пайтида қўйилган тарнсформаторлар бир бор таъмир кўрмаган. Таъмирлаш учун эса ташкилот маблағ ажратмайди, деб важ кўрсатишади.
Электр токининг узилиши эса тинимсиз такрорланаверади. Худди шундай ҳолат 12 март куни бўлди. Кеч соат 21.00 дан ўтиб қолган эди. Ҳамма ўз иши билан банд . Кимдир телевизор кўриб дам олаётганди, кимдир тикув машинасида ўтириб тикув қилаётганди, кимдир электр печкада эрталабга пишириқ пишираётганди, яна кимдир компьютерда ўтирганди. Шу пайт шунақанга ток ярақлаб кетдики, уйдаги иккита лампочка паққиллаб отилди. Тедевизор, компьютер куйди. Чироқ ўчди.
Ташқарига чиқдим. Қўшнилар ҳам чиқишди. Бири телевизори куйганини, бири телевизори билан музлатгичи куйганини, бири эса электрн печкамга ҳеч нарса қилмаганмикин дея суҳбатлашиб турарди.
Қишлоғимизнинг электр устасига телефон қилиб, кўчамизда чироқ ўчиб қолганлигини, келиб ёқиб беришини сўрадик. Уста эса, келмаслигини, келган билан ёқолмаслигини айтди.
Эртаси куни маҳалламиз одамлари биргалашиб қишлоқ фуқаролар йиғинига бориб чироғимиз ўчиб қолаётганлигини айтдик. Маҳалла котиби туман электр тармоғи ташкилотига телефон қилди ва иккита электр монтёр келишини айтди. Икки соатлар ўтгач электр усталари келди ва бир талай “запчаст” кераклигини айтди.
Чироғимизнинг ёниб туриши учун яна хонадон бошига 1000 сўмдан пул
йиғишга мажбур бўлдик. Бизнинг кўчада ўзи 50 га яқин хонадон бор. Яна қанча кўча ва хонадон бор. Пулни йиғиб беришди. Чироғимиз ёнди.
Бироқ эртаси куни яна шу аҳвол. Яна электрикларни чақирдик. Бу электриклар эса кеча келган мотёрлар ҳеч нарса қилмай, одамларни алдаб, пулни олиб кетишган экан дейишибди.
Кўчамиз аҳли ҳар ҳафта икки кун пул тўлашдан чарчашди. Энди тўламаймиз, бироқ чироқни ёқиб берасизлар дедик. Хайриятки, чироқларимиз ёнди. Илоҳим, шамол бўлмасин, итлар симёғочга яқин келмасин, деб Худодан сўраб турибмиз. Электр муаммомси қачон тугайди, билмаймиз.
Саида ҚУРБОН
“Бирдамлик” Халқ демократик ҳаракати Жиззах вилоят бўлими раҳбари