Бугунги кунда Хоразмда электр қувватининг узиб қўйилиши одатий ва табиий ҳолга айланган. Чироқ шаҳарларда озроқ, қишлоқларда кўпроқ ўчади. Кимдир шам, ёқилғи солинадиган фонус ёқуб, кимдир пули етарли бўлса, “движок”ишлатиб, бир амаллаб кун кўради, гўё ҳамма кўникиб кетгандай. Лекин шу билан бирга айрим пайтларда инсонлар ҳаётида айнан чироқ ўчиб қолиши туфайли кутилмаган фожеалар ҳам содир бўлиб туради.
Яқинда Хива туманидаги Мувастон маҳалласида шундай фожеа юз берди. Шу маҳалла истиқоматчиси, 1958 йилда туғилган Матчонбой Шомуротов электр транформаторига яқин ҳудудда яшар эди. Ўша вақтда унинг уйида ва қўшниларида 3 кун давомида симларга уланган чироқлар ёнмади. Матчонбой бошқа кун бўласа бошқаларга ўхшаб чидаган бўларди балким, лекин набирасининг туғилган кунида чироқлар ёруғида ўйнаб-кулиб ўтиришни истади.
У, гап трансформаторда бўлса керак, деган фикрда оқшом қўйнида трансформатор сари йўл олди. Қоида бўйича трансформсатор турган жой ҳимояланган, кимдир билмасдан токка тушмаслиги учун панжарасининг эшиги қулфланган бўлиши керак эди. Матчонбой Шомуротов борганда эса у очиқ турган, энди кириб, чироқни ёқувчи мурватга қўл узатиб, бузуқ сақлагични тузатаман деб турганида маҳаллага электр токи юборилган ва уни ток уриб, отиб юборган. Натижада Матчонбой Шомуротов Шўро давридан қолган эски трансформаторнинг носозлигидан юзага келган электр токи уришидан ҳалок бўлган. Кейин “Тез ёрдам “ келиб, шифокорлар “ҳалокат мастликда содир қилинган” деган ташхис қўйганлар.
Бахтиёр МАҲМУДОВ