– Пахтакор тумани Пахтакор хўжалигида яшайман, – дейди ўзини Жамила деб таништирган совуқданми, касалликданми титраётган аёл. 5 нафар фарзандим бор. Икки бор жигарим операция қилинди. Ундан сўнг талоғимни олиб ташлашди. Мана чап қўлимни кўринг, – дея у қўлининг бармоқларини кўрсатди. Қўл бармоқларининг ногиронлиги шундай кўриниб турарди.
– Нон ишлаб чиқариш комбинатда ишлардим. Ишлаётган пайтимда бармоқларимни нон кесадиган станок кесиб кетди, бир неча ойлар касалхонага қатнадим ва бармоқларим қийшиқ, эгилмайдиган бўлиб қолди. 2011 йил тиббий кўрикдан ўтдим. Тиббий кўрик пайтида текшириб кўриб, менга 3 гуруҳ ногиронлигини беришди. Бироқ 3 гуруҳ ногиронлиги учун нафақа тўланмас экан. Иқтисодий жиҳатдан жудаям қийналаяпман. Бу бармоқларим билан хамир ҳам қора олмайман, нон ҳам ясай олмайман. Хуллас, на нон ёпа оламан, на кашта тика оламан, на бирор нарса тўқий оламан-у на бирор нарса кўтара оламан. Ҳеч ишга ярамайман. Тиббий кўрик комиссиясидан, иккинчи гурух ногиронлигини беринглар, деб илтимос қилаяпман. Иккинчи гуруҳ ногиронлигига тўғри келмайди, деб беришмади – дейди Жамила.
Ушбу масала юзасидан Пахтакор туман ижтимоий таъминот бўлимининг нафақа тайинлаш ходимлари билан суҳбатлашдим. Улар ҳақиқатдан ҳам 3 гуруҳ ногиронларига, агар шахс меҳнатдан ногиронлик олган бўлсада ногиронлиги учун нафақа тўланмаслигини, мехнатдан ногиронлик фақатгина ҳарбий хизмат вақтида ногиронлик олган кишиларгагина нафақа берилишини айтишди. Аслида Жамиланинг жигари икки бор жарроҳлик операцияси қилинган. Бундан ташқари унинг талоғини олиб ташлашган. Булардан ҳам кўз юмсак, унинг ногиронлиги бармоқларидан шундоққина кўриниб турибди-ку!
Саида ҚУРБОН.
Жиззах вилояти, Пахтакор тумани.