- Тангриев Адхам
МАҚОЛАСИГА МУНОСАБАТИМ ЁКИ ИСЛОМ КАРИМОВГА ОЧИҚ МУРОЖААТ
Ислом Абдуғаниевич, мен “Бирдамлик” сайтида чиққан Маматқулова Муборакхоннинг “ИЛОННИНГ БОЛАСИ ИЛОН,ЧАЁННИНГ БОЛАСИ ЧАЁН ЁКИ ИСЛОМ КАРИМОВГА ОЧИҚ ХАТ” мақоласини ўқиб чиқдим ва ундаги фикрларга тўлиқ қўшиламан. Ўзбек халқи қизини турмушга узатаётганида ёки ўғлини уйлантираётганида бўлажак куёвнинг, келиннинг аждодлари ким бўлганини яхшилаб суриштириб, кейин бир қарорга келадиларку, нега энди бутун бир мамлакатни беш-ўн йил бошқарадиган одамнинг аждодларини текшириб кўриб, сўнг хулоса чиқаришга халқимизнинг ҳаққи бўлмаслиги керак? Давлат мулкини ўзлаштириб, фарзандларини нопоклик билан боққан одамнинг фарзанди мамлакат президенти бўлиб қолганда халқни ва мамлакатни қандай аянчли аҳволга солиши мумкинлигини охирги 22 йил давомидаги тарихимиз аниқ кўрсатдику! Мен Маматқулова Муборакхоннинг таклифини тўлиқ қўллаб – қувватлаган ҳолда яна бир таклифни илгари сурмоқчиман.
Маълумки, Ўзбекистон Республикаси Конституциясининг 90 –моддасида: “Айни бир шахс сурункасига икки муддатдан ортиқ Ўзбекистон Республикасининг Президенти бўлиши мумкин эмас” деб ёзиб қўйилган. Мен Конституциямиздаги шу жойни: “Айни бир шахс 10 йилдан ортиқ Ўзбекистон Республикасининг Президенти бўлиши мумкин эмас” деб ўзгартириш керак деб ўйлайман,чунки Конституциямизда: “Айни бир шахс сурункасига икки муддатдан ортиқ Ўзбекистон Республикасининг Президенти бўлиши мумкин эмас” деган эски формулировка сақланиб қолса сиёсий фирибгарлар турли сохта референдумлар, сиёсий найранглар ёрдамида президентлик лавозимини ҳохлаганича эгаллаб ўтириши мумкин.Сиз охирги 22 йиллик фаолиятингиз давомида буни тўлиқ исботлаб бердингиз. Агар Конституциямизга мен таклиф қилгандек: “Айни бир шахс 10 йилдан ортиқ Ўзбекистон Республикасининг Президенти бўлиши мумкин эмас” деб ўзгартириш киритилса бундай найрангларнинг олдини олган бўламиз. Бордию, Худо кўрсатмасин, сиздан кейин президентлик лавозимига сизга ўхшаган қасамхўр одам келиб қолса ҳам у сизга ўхшаб аллақачон тугаб кетган президентлик муддатини турли ноконституцион найранглар билан узайтириб олиш имкониятидан маҳрум бўлади ва узоғи билан 10 йилда президентлик муддати тугашини, қўлидан ҳокимият кетиб у ҳам оддий фуқарога айланишини билгани учун сиз каби ўз халқини ўлдиришга, халқнинг мулкини талон -тарож қилишга журъат эта олмайди. Президентнинг фарзандлари ҳам ота ёки онаси узоғи билан 10 йилда президентлик лавозимидан кетишини билгани учун халқ мулкини ўзлаштириб турли кўнгилхушликлар ўтказишга, чет эллик донгдор текинхўрларни боқишга сарфлашдан олдин яхшилаб ўйлаб кўради.
Ислом Абдуғаниевич, Ўзбекистон Республикаси Конституциясига тегишли ўзгартиришлар киритиб, ўзингиздан кейин Ўзбекистон Республикаси президенти лавозимига ўзингизга ўхшаган шахс келиб қолишини олдини олсангиз, 22 йилдан бери зулмингиздан азоб чекаётган халқимизнинг кўкрагига озгина бўлса ҳам шамол тегарди.
Тангриев Адхам