Куни кеча Ўзбекистонда автобмабиль ёқилғисининг танқислиги сабаб ҳайдовчилар 2-3 соатлаб навбат кутишга мажбур бўлаётгани ҳақида хабар берган эдик. Ҳукумат мавжуд муаммони ҳал қилишга киришмаган, ва ё уддасидан чиқмаган чоғи, бензин тақчиллиги барҳам топиш ўрнига авж олмоқда. Айни дамда Самарқанд вилоятида қўлда сотилаётган 1 литр бензин нархи 6 минг сўмга чиқиб етди. Бу ҳолат мамлактада жиддий кўнгилсизликларни келтириб чиқармоқда.
Самарқанд шаҳридаги темир йўл вокзали яқинида жойлашган автомабилларга ёқилғи қуйиш шаҳобчасида бензин келишини кутган 300 га яқин ҳайдочи 16 ноябрдан 17 ноябрга ўтар кечасини, бутун бир тунни ўз машиналарида мижжа қоқмай ўтказишга мажбур бўлишган. Ҳавонинг авзойи бузуқ эмасми, тунги изғиринда ҳайдовчиларнинг бири уйидан ғамлаб келган чакмонига, бошқа бири чойшабу кўрпасига ўраниволиб, тонгни қарши олишига тўғри келган. Азборойи машиналарнинг бисёрлиги боис, навбатнинг охири кўринмаган. Йўлакларга сиғмай кетган уловлар икки-уч қатор саф тортган. Бугун, 17 ноябрь куни тушликка яқин 15 нафар йўл патруль хизмати ходимлари, аҳолига тушунарли тилда айтганда ДАН ходимлари навбат кутиб турган транспортларни таппа “босган”. Кўз очиб юмгунча 50 дан ортиқ шофёр ҳайдовчилик гувоҳномасидан айрилиб қолган. ДАН ходимларининг иддаосига кўра, ҳали йўқ бензинга навбат кутиб, то катта серқатнов йўлнинг қарйиб ўртасига қадар саф тортган трантпортлар йўл ҳаракатига халақит берган.
Тун бўйи киприк қоқмай, соқувдан тиришиб чиққанлиги эвазига ҳам бензиндан, ҳам ҳайдовчилик гувоҳномасидан қуруқ қолган шофёрлар аламдан беўтин ёниб кетишган. Оқибатда, ғазабланган ҳайдовчилар билан ДАН ходимлари ўртасида даҳанаки жанг бошланган. Бензин танқислигини бартараф этишга қурби етмаган Ҳукумат ҳайдовчиларга зуғум қилишдан нарига ўтолмаган.
Орзигул ХУДОЁРОВА
“Бирдамлик” Халқ Ҳаракати Ўзбекистон бўлими