Маълумки, “Бирдамлик” Халқ Ҳаракати шу йилнинг 12, 13, 14 октябрь кунларида Ўзбекистон бўйлаб барча фуқароларни “Ош” (оммавий шикоят) тадбирига таклиф этган эди.
Ўшбу тадбирнинг илк куни пойтахт Тошкент шаҳрида қай тарзда ўтказилганлиги сизга маълум. Бу ҳақида олдинги хабарларимизда хабар берган эдик. Ва мазкур хабаримизни “… Ҳали олдинда тадбирнинг икки куни турибди. Икки кунгина эмас, балки икки сония ҳам дунёни, инсонлар тақдирини ўзгартиришга қодир” деган мазмунда, оптимисттик руҳдаги сўзлар билан якунлаганимиз ҳам ёдингизда бўлса керак.
Ниҳоят, “Бирдамлик”чилар кутган ўша иккинчи кун ҳам келди. Режага кўра маҳаллий вақт билан соат 11.00 да фуқаролар Олой бозорининг марказий дарвозаси олдига йиғилишлари, унан кейин эса жамоат ва йўл ҳаракати қоидаларига риоя этган ҳолда ўз ариза ва шикоятларини Олий судга олиб бориб топширишлари лозим эди.
Не ажабки, тадбирнинг иккинчи куни ҳам айнан пойтахт Тошкентда кутилган натижани бермади. Гап шундаки, тадбирнинг илк кунидан фарқли ўлароқ бугун Олой бозорининг марказий дарвозасига, ўтказилиши режалаштирилган “ОШ” тадбирига беш нафар киши ташриф буюрди. Белгиланган жойга Ҳаракатнинг Ўзбекистон бўлими раҳбарининг ташкилий ва жамоатчилик билан алоқалар масалалари бўйича ўринбосари Абдулла Тожибой ўғли етиб келди. Кўп ўтмай Абдулла аканинг сафига Ҳаракатнинг Ўзбекистон бўйича раҳбар ўринбосари Татьяна Давлатова ва уларга ҳамроҳлик қилган ҳамфикирининг келиб қўшилиши ҳисобига иштирокчилар сони уч нафарга етди. Кўп ўтмай тадбирни ёритиш илинжида Ҳаракатнинг матбуот Маркази ходими Малоҳат Эшонқулова ҳам воқеа жойида ҳозир бўлди. Ва ниҳоят Ҳаракатнинг Тошкент шаҳар бўйича раҳбари Владимир Ҳусаинов иштирокчилар сонини бештагa етказди.
Кўриб турганингиздек “Ош” тадбирига ташриф буюрганларни бевосита “Бирдамлик” ҳаракатининг фаоллари ташкил этди.
Шуни афсус билан таъкидлаш керакки, “Ош” ( Оммавий шикоят) тадбирига арз-додлари йиллаб инобатга олинмасдан, идрама-идора сарсон бўлиб, сарғайиб юрган фуқаролардан бирор киши ҳам келмади, келай демади.
Бунинг жавобини топиш учун, назаримизда, “ОШ” тадбирига ташриф буюрган “Бирдамлик”чиларнинг ҳаракатига назар солиш кифоя. Гап шундаки, тадбирга “Бирдамлик” Халқ Ҳаракатининг “Ош” тадбири, “Ош” тадбири” деган сўзлар битилган плакатлар тайёрлаб келинган эди. Бундан муддао, тирикчилик ташвишида турфа томонга елаётган чор-атрофдаги одамларнинг эътиборини тортиш, табдир моҳиятини очби бериш, оз бўлсада ўзгаларга англатиш эди. Бироқ кўп афсуски, ёзувлар туширилган мазкур плакатларни очиб, кўтариб туришга “Бирдамлик”чилардан бирортасининг ҳаддилари сиғмади. Нега? Масалан, Абдулла Тожибой ўғли – қилган-қилмаган ишилари учун суд томонидан бир неча маротаба ноҳақ жаримага тортилганлардан бири: нақд 18 миллион тўлаб қўйиши шарт давлатга. Татьяна Давлатова ҳам жаримага тортилишдек “бахт”дан бенасиб эмас. Малоҳат Эшонқулова ҳам “очлик акцияси”ни ўтказгани учун Ҳукумат томонидан уч миллион сўмлик жарима билан “тақдирланган”лардан. Айтишади-ку, “Оғзи куйган, қатиқни ҳам “пуфлаб” ичади” деб. Бу бежиз айтилмаган. Эҳтимол, “Бирдамлик” фаоларига қўлланилган шу каби ноҳақликлар гирдоби уларни маълум манода чўчитиб, ўйлантириб қўйган бўлса, ажаб эмас. Хусусан, Ўзбекистон Респуликасининг маъмурий жавобгарлик тўғрисидаги Кодекснинг 201-, 202-, 203- моддаларига асосан “плакат кўтариб туриш, кўчада юриш” жамоат тартибини, аниқроқ қилиб айтганда, қонунни бузиш ҳисобланадики, бунинг учун белгилаб қўйилган жазо чоралари мавжуд. Афтидан, бугун тадбирга ташриф буюрганлар ЎзРесМЖт кодекснинг ана шу моддаларини сув қилиб ичган кўринади… Мазкур ҳолат тавсифидан, ўйлашимча, “Бирдамлик” Халқ Ҳаракати ташаббуси билан ташкил этилган “Ош” ( оммавий шикоят) тадбирига, мана, икки кундирки ҳеч бир кимса келмаётганлиги, тадбир муваффақиятсизликка учраётганлиги сабабини тушуниб етдингиз, адашмасам. Демоқчи бўлганим, “Бирдамлик” фаоллариники Ҳукумат қурқувда ушлаб туришга қодир экан, муваффақ экан, ўзга фуқаролардан нима ҳам кутиш мумкин? Омма қалбига йиллар давомида валомат ҲУКУМАТИМИЗ қадаган қўрқув ва ваҳима қутқусининг аришига, эҳ-ҳей, яна бир неча қовун пишиғи бор-ов, адашмасам. Бу ҳолатни яна нима деб ҳам изоҳлаш мумкин?…
МАЛОҲАТ