Зарнигор
Хабарингиз бор, Ўзбекистон Миллий телерадиокомпанияси, “Ёшлар” телерадиоканалининг икки собиқ ходими, журналистлар Малоҳат Эшонқулова ва Саодат Амоновалар ЎзМТРКдаги мавжуд қонунбузилишлар борасида бундан икки йил олдин бонг уришган ва бундай “ўзбошимчаликлари” эвазига ноқонуний тарзда ишдан бўшатилган эдилар. М. Эшонқулова ва С. Амонова Президентнинг қабулига киришни, бу каби ноҳақликлар борасида шахсан мамлакат отасини бохабар қилишни орзу қилишганди. Ана шу эзгу мақсадда бу икки ҳамкасб Ислом Каримовга бир эмас, нақд 56 та буюртма хати жўнатса-да, бирор бир жавоб олишолмади. Ана шунда ҳам Президент қабулига киришдек орзулари шунчаки бир сароб, ушалмайдиган орзу эканлигини англаб етмаган журналистлар 27 июнь – Ўзбекистонда оммавий ахборот воситалари ходимлари байрами деб аталадиган кунда “Муҳбарам Президент Ислом Абдуғаниевич Каримов! Бизни қабул қилинг! Биз очлик эълон қилдик” деб ҳукумат биноси олдига боришди. Бироқ Ўзбекистон учун “қалтис” ҳисобланган бундай вазият қизлар кутганидек натижа бермади, аксинча, бу қарорлари уларга қимматга тушди. Улар бунинг бадалига сал кам 3 миллионлик жарима тўлашга ҳукм этилди. Ўзбекистондек бир давлатда кимсан Бош вазир ўринбосари А. Арипов, бутун бир бошли ЎзМТРК билан кураш майдонида бел боғлашиш осон иш бўптими? Лекин бу қизи қурмагурлар ана шу ҳаммага аён бўлган ҳақиқатни тан олгилари келмайди денг. Суднинг жазосидан сўнг ҳам тинай дейишмади. Мана, ҳали ҳамон уйларида очлик акциясини давом эттириб ў-ўтиришибди. “Йиқилган курашга тўймас” деб шуни айтсалар керак-да. тортилишди. Мана, бугун, 29 июнь куни очлик акциясининг учунчи куни. Тўғри, очлик эълон қилган журналистлардан ҳол аҳвол сўраш ва ҳуқуқий маслаҳатлар бериш мақсадида уларнинг ҳузурига Ўзбекистондаги айрим Мустақил ҳуқуқ ҳимоячилари келиб туришибди. Мана, бугун ҳам таниқли мустақил ҳуқуқ ҳимоячиси Суръат Икромов рафиқаси билан очлик акциясини ўтказаётган журналистлардан ҳол сўрагани борди…. бироқ негадир ҳукумат идоралари ушбу очлик акциясига нисбатан скут сақлашмоқда. Назаримизда, улар икки аёлнинг очлик эълон қилишини ножиддий қабул қилишмоқда шекилли….
Куннинг иккинчи ярмига бориб эса М. Эшонқулова ва С. Амоноваларнинг соғлиги ёмонлашиб қолганлиги сабабли, тез тиббий ёрдамга мурожжат қилишга тўғри келди. Тез тиббий ёрдам хизмати шифокори Ҳасан Сиддиқов беморларнинг қон босимини, юрак уришини текшираркан, аҳвол ниҳоятда жиддий эканлигини маълум қилди.
Шифокор журналистларга корвавол, валидол таблеткаларини ичираркан, оғриқ қолдирувчи укол билан эмлаб ҳам қўйди.
Очлик акциясининг учунчи куни қизларнинг соғлиғига ўз салбий таъсирини ўтказмасдан қолмади. Натижада журналистлар кечки соат 21.00 га яқин яна тез тиббий ёрдам чақиртиришга мажбур бўлишди. Тез ёрдам шифокори Муҳаммадшокирхон Баҳодирхонов журналистларни кўрикдан ўтказаркан, М. Эшонқуловани соғлом, аҳволи қониқарли деб “ташҳис” қўйди. Бироқ С. Амоновани кўздан кечираркан, беморнинг ўн икки бармоқли ичагида яра мавжудлигини, агар шу алфозда очликни давом эттираверса, яра ошқозонга ўтишини, ҳатто рак касаллигини вужудга келтириш эҳтимоли борлигини айтиб огоҳлантирди. Кўрик сўнгида шифокор С. Амоновани шифохонага олиб кетиши лозимлигини айтди, бироқ С. Амонова “Шифохонага боришдан бош тортаман. Шифокорларга давоим йўқ” деган мазмунда тилхат ёзиб беришга ва очлик акциясини дамот эттиришга қарор қилди.
Гап шундаки, очлик акциясини давом эттираётган журналистларнинг, иккинчи бор чақирувга келган тез тиббиё ердамдан кейин, қайта оғирлашишга, бетоб бўлишга ҳақлари йўқ экан. Буни “03”даги чақирув қабул қилиб олаётган ходимларуўқтиришди. “Бугуннинг ўзида учинчи бор (ваҳоланки, бор йўғи икки бор) тез ёрдам чақиртиришларинг. Тез ёрдам бир беморга бир кунда уч мартагина бориб ёрдам кўрсатади, холос. Шу бугун яна бир бор қўнғироқ қилсанглар, сизларга бошқа тиббий ёрдам кўрсатилмайди, скорий бормайди!” дея иддао қилди гўшак ортидаги аёл овози…. Энди худо денгки, очлик акциясини ўтказаётган журналистларга бир кунда 3 маротаба тез ёрдам чақиришга тўғри келмасин, аниқроғи, қайта-қайта тоблари қочиб қолмасин. Акс ҳолда….
Бизнинг қўлимиздан нима ҳам келарди. Воқеалар ривожини кузатамиз….