Туркистонда

Дадахон Ҳасан
Туркнинг юраги – Туркистон ватанимиз бор,
Тупроқлари жаннат макон чаманимиз бор.
Дунёларни забт айлаган саманимиз бор,
Майли ўзбек, туркман, қозоқ, қирғиз бўлайлик,
Туркистонда бир дарахт бир илдиз бўлайлик.
Нега юз милён бўлдигу миллат бўлмадик,
Аҳли суврат бўлдик, аммо сийрат бўлмадик,
Боболар бўлмадик, шаъну-шуҳрат бўлмадик.
Майли ўзбек, туркман, қозоқ, қирғиз бўлайлик,
Туркистонда бир дарахт бир илдиз бўлайлик.
Қуллар бўлиб умр ўтказдик, тарих кечирмас,
Қора дафтарлардан бизни ҳаргиз ўчирмас.
Ноаҳил эл эканимиз дунёга сир эмас,
Майли ўзбек, туркман, қозоқ, қирғиз бўлайлик,
Туркистонда бир дарахт бир илдиз бўлайлик.
Билолмадим бизлар қачон бир жон бўламиз,
Томирлар бирлашиб қачон бир қон бўламиз,
Бармоқлар бирлашиб қутлуғ турон бўламиз.
Майли ўзбек, туркман, қозоқ, қирғиз бўлайлик,
Туркистонда бир дарахт бир илдиз бўлайлик.
Азал-азал туркий халқлар қадрдон эрди,
Ёвга қарши қоплон эрди, паҳлавон эрди,
Ҳар бири бир ханжар эрди, беомон эрди,
Майли ўзбек, туркман, қозоқ, қирғиз бўлайлик,
Туркистонда бир дарахт бир илдиз бўлайлик.
Ҳануз кишан қўлимизда, қачон билурмиз,
Ҳар қадамда йўлимизда, қачон билурмиз,
Душман ўнгу-сўлимизда, қачон билурмиз,
Майли ўзбек, туркман, қозоқ, қирғиз бўлайлик,
Туркистонда бир дарахт бир илдиз бўлайлик.
Ғаним-ғайюр қайта босиб олсинми яна,
Она ватан ишғолчига қолсинми яна,
Сиртмоғини бўйнимизга солсинми яна,
Майли ўзбек туркман қозоқ қирғиз бўлайлик,
Туркистонда бир дарахт бир илдиз бўлайлик.
Итга айланиб қопмайлик бир-биримизни,
Ёвдан ҳимоя қилайлик ўр-қиримизни,
Қайта кашф этайлик толе-тақдиримизни,
Майли ўзбек, туркман, қозоқ, қирғиз бўлайлик,
Туркистонда бир дарахт, бир илдиз бўлайлик.
www.yangidunyo.com