Пластик карточка ҳангомалари
Январь ойининг пенсиясини турли режаларни каллагинамга жо қилган ҳолда кутмоқдаман. Бугун-эрта олиб келиб қолиши керак. Орзуларим билан осмону-фалакда чарх уриб юрганимда, Ўзбекистон почтаси ОАЖ Зарбдор туман почта хизмати раҳбари Суйима Нурматова қўнғироқ қилиб қолди.
-Абулфайз ака, ҳо, Абулфайз ака, эшитаяпсизми?
-Эшитаяпмиз, қулоғим сизда,- дедим виқор билан.
-Пенсиянгизни пластик карточкага ўтказибсизми?
-Нега ўтказар эканман. Бу нима деганингиз?
-Бизга туман молия бўлимининг бюджетдан ташқари пенсия жамғармаси бўлими бошлиғи Илҳом Анорбоевдан пенсиянгизни пластик карточкага ўтказиш ҳақида топшириқнома келди. Мабодо бу ҳақда уларга ариза берганингиз йўқми?
-Ариза берганим йўқ. Хотиним билан қизим маошларини тўлик пластик карточкага ўтказаяпти. Энди нима қиламан.
-Молияга қўнғироқ қилиб кўрингчи. Бирон нима дер.
Ўзим 1-гуруҳ ногирони бўлсам. 10 километр йўл босиб, туман марказидаги банкка бориб, пластик карточкани қўл қўйиб олишим керак. Ундаги маблағни нақд пулга айлантириш ҳам бир ташвиш. Фойизи бор.
Ана шуларни ўйлаб, асабим бузилди. Тўнғиллаганимча туман молия бўлимига қўнғироқ қила кетдим.
-Ҳой, ким бор? Илҳомжон деганини қандай топсак бўлади.
Илҳомжон ҳокимиятга кетган экан. Қўнғироқ устига қўнғироқ қилавериб, охири уни топдим. Минғиллаб дардимни айтдим.
– Ака, мана қўлимда тўлдирилган шартномангиз турибди. Чиройли имзоингиз ҳам бор.
-Мен ҳеч қанақа шартнома-партномага имзо чеккан эмасман,- дедим аччиғим чиқиб.- Энди шикоят қилишни бошлаймиз, шекилли.
Бу гапим Илҳомжонга таъсир қилди шекилли, тушга яқин туман газетасининг муҳарририни эргаштириб уйимга келди. Ҳақиқатдан ҳам қўлида тўлдирилган шартнома. Лекин имзо ҳам, ёзуви ҳам меники эмас.
-Пенсия ҳужжатларингизни кўтариб, имзоингизни текшириб кўрдим,- деди Илҳом.- Ўхшамаганлиги учун мана ҳузурингизга келдим. Сиз яшаётган “Шодлик” маҳалла фуқоролар йиғини раиси вазифасини бажарувчи Эргаш Пардабоев билан ҳам учрашдим. У бу менинг ишим эмас деб, шаддодлик қилди.
Гап-сўзлардан шу нарса маълум бўлдики, пенсионерларни ўз вақтида нақд пул билан таъминлаш қийин бўлаяпти экан. Шунинг учун хоҳловчилар пенсияларининг бир қисмини пластик карточкаларга ўтказиш мумкин экан. Илҳомжон шароитимни тушунди, пенсиямни тўғрилаб олиб келиб берадиган бўлди. Лекин менинг ўрнимга шартномани тўлдириб, молияга топширган одамнинг кимлигини аниқлаш қийин бўлди. Мен яшаётган маҳалла раиси Эргаш Пардабоев эса, мени кўрди дегунча ранги-туси ўзгариб энкайганича, қибла томонга қўл очиб, ”агар шу ишни мен қилган бўлсам, тепамда худо турибди,”- деб, омин қилиб юбораяпти.
Жуда ўйланиб қолдим. Ким қилган экан бу ишни? Рўза деганини канда қилмай тутиб келаяпман. Тузуккина номоз ҳам ўқиб турардим. Лекин қон босимим кўтарилавергани учун, шаҳарчада яшайдиган таниқли ёзувчи оғайним, “эрталаб чойдан бир соат олдин 30 грамм, тушлик қилишдан бир соат олдин яна 30 грамм, кечки овқатдан бир соат олдин яна 30 грамм, ҳаммаси бўлиб бир кунда 90 грамм ҳалиги сабилдан ютиб оласиз-да, у ёқ-бу ёққа “тарс-турс” қилиб қилиб бориб келаверасиз. Қарабсизки, қон босимингиз пасайиб турибди-да,”-деб маслаҳат берганди. Ёзувчининг маслаҳатига амал қилдик, албатта. “Тарс-турс”ни ҳам қойиллатаяпмиз. Аммо шайтон-у, девлар номоз ўқимаганлигим учун мендан ҳайиқмай қўйишди. Афтидан мени ҳам ўзларининг одами деб ўйлашиб, шартномани тўлдириб юборган бўлсалар керак. Яна ким билади дейсиз?
Абулфайз БАРОТОВ.