Биз Америкага келгандан кейин турмуш ўртоғим, шоир Юсуф Жумани золим Ислом Каримовнинг зиндонидан озод қилиш учун тинмай курашамиз деган эдик. Шунга кўра, бир қанча жойларда пикетлар ўтказдик. Ҳали пикетларимиз давом этади. Ҳозир эса курашимизнинг иккинчи даврасини бошладик. Бу шундан иборатки, Юсуф акам ёзган шеърлари ва қилган сиёсий тадбирлари учун ўлим билан юзма-юз қолаётганлари, ҳар куни қийноқларга тутилаётганларини бутун Америкага маълум қилмоқчимиз.
Бу ишни АҚШнинг Сенатидан бошладик. Қарийб 100 нафар сенаторга Юсуф Жуманинг кимлиги ва унга нима сабабдан зулм ўтказилаётганлиги ҳақидаги хатларимни топширдик. Ҳар бир сенатор Ўзбекистон баробарида Ислом Каримовни ҳам таниб олиши керак.
Дунё сиёсатини яратаётган сенаторлар бугун Америка билан яқинлашишни орзу қилаётган золимнинг тузоғига тушиб қолмасликлари ва ундан сиёсий маҳбусларни озод қилишни талаб этишларини сўрамоқдамиз.
Навбат Конгреснинг қуйи палатасига. Энди барча конгресменларни ҳам огоҳлантириб чиқмоқчимиз. Шундан кейин навбат АҚШ Давлат департаменти ва Президент Обама маъмуриятига. Ўзбекистонда тингламасалар ҳам АҚШда машҳур бир шоирнинг аёлини, қочқинлик азобини тортган онани тинглайдиганлар бор экан. Ўзбекистонда Каримовнинг мустақиллик байрами нишонланиши олдидан эса БМТ биноси ёнида пикетларимизни тиклаймиз.
Мен ҳаммага мурожаат қилиб, қўлингиздан нима келса ишга солишингизни ва шоирингиз Юсуф Жуманинг озодлиги ҳаракатига қўшилишингизни сўрайман.
«Бирдамлик” ҳаракатининг Вашингтон шаҳри хабари.