Қашқадарё вилояти инсон ҳуқуқлари ҳимоячилари ва “Бирдамлик” ҳаракати бирлашиб жорий йилнинг 5 июнь куни норозилик намойиши ўтказишни режалаштирган эди. Мақсадимиз инсон ҳуқуқлари бузилаётганлигига чек қўйиш, қариялар, ногиронлар ва болалар нафақаларини вақтида берилишига эришиш, фермерлар ҳуқуқлари бузилишини олдини олиш, ичимлик суви танқислигига барҳам бериш ва бошқа бир талай муаммоларни кўтариш эди.
Ўзаро телефон орқали қилган мулоқатимиз тегишли станцияларга етиб борган кўринади. Ҳукумат вакиллари зудлик билан бу муаммоларни бости-бости қилишга киришиб кетишди. 31 май куни Қарши шаҳар Халқ банки ходими уйимга қўнғироқ қилиб, болалар нафақасини олиб келганлигини айтди. У уйимни топа олмаётганлигидан шикоят қила бошлади.
Мен келишилган жойга етиб бордим. Берилиши керак бўлган пулни беришди. Шунда банк ходими, менга бир парча қоғозга тушунтириш хати ёзиб беришимни илтимос қилди. Бу юқори – Марказий банк талаби эканлигини айтди. Мен умуман ҳеч нарсага тушуна олмай қолдим. Нима учун боламни пулини тушинтириш хати билан олишим керак?
Қанчалик тушунтирмай илтимос қилишди. Вақтида болалар нафақасини олаяпман, деб ёзиб беришимни сўрашди. Бу қонунга зид бўлсада, мен 31 май куни нафақани олганлигим ҳақида ёзиб бердим, аммо вақтида олишим ҳақида эмас. Ҳаётимда вақтида нафақа олган эмасман. Майли бугун менга боламни нафақасини шу йўл билан беришди. Мендайлар жуда кўп.
Улар ҳам пикет, намойиш ёки шу каби сиёсий акция қилишлари керак экан-да?!.
Қанийди ҳамма ҳам ўз мақсадига фақат сиёсий йўл билан осонликча етишиш мумкинлигини тушуниб етса эди?
Гулшан Қораева. Қарши.ш.