Дори-дармон соҳаси коррупсияга бўйнидан ботиб кетган. Муддати ўтиб кетиб, яроқсиз ҳолга келган дори воситасини керакли ташкилотга пора бериб яроқлилик муддатини бемалол яна беш йилга узайтириб олиш мумкин. Қўшни республикалардаги шубҳали лабаротарияларда Европада ишлаб чиқариладиган дори-дармонларнинг қалбакисини тайёрлаб, жонажон Ўзбекистонимизга олиб келишади.
Ким билан гаплашсанг “Ҳозирги кунда касал кўпайган. Чунки экология бузилган” дейди. Дорихоналар сонининг керагидан юз баробар кўплиги ҳам халқ орасида касаллик кўпайганлигидан дарак беради. Қайси экология бузилган. Осмондан ёмғир ўрнига кислота ёғяптими. Ёки Ўзбекистондаги дарахт япроқлари ўзидан заҳар чиқаряптими.
Балки ариқларимиздан сув ўрнига ахлат оқаётгандир. Ариқларимиздан умуман сув оққани йўқ. Кўп жойларда далаларимизни канализация суви билан суғоришади. Йўқ. Экология кўпам бузилмаган. Агар сиёсий ва иқтисодий экология тўғрисида гапирсак, “бузилган”деган сўзни ишлатиш мумкин. Инсон маънавий экологияси бузилган десак ҳам ҳақ гапни айтган бўламиз.
Бировнинг боғига ўғирлика тушган одам мевали дарахт шохларини аямай синдиради. Чунки боғ уники эмас. Унинг учун муҳими кўпроқ мева ўғирласа, бас. Бизлар эса Ўзбекистон деган ўлкан боғда ўзимизни ўғирилардай тутамиз. Бу боғ биздан кейин болаларимизга қолишини ҳечам ўйламаймиз. Мансабдорлар ва йирик бойларни тушунса бўлади. Улар хоҳлаган пайти Ўзбекистондан бутунлай чиқиб кетиши мумкин.
Шунинг учун улар пул жамғаришда Ўзбекистоннинг келажаги ҳақида унчалик ҳам қайғуришмайди. Ўзбекистон деганлари минглаб камбағал ва қашшоқ ўзбекларникидир. Лекин улар ичимиздан чиққан илонлардан ватанимизни ҳимоя қилишолмайди. Сабаби улар эркин эмас.
Охирги қисми.
Раҳмат Қурбон,
журналист ва шоир
Каззоб ва ёвуз дўхтирларга аталган шеърлар
(2005-йил апрель MDS нервпаталог шифокори Отохон Матчонов)
Асабшунос Отахон Матчон,
Ким буюрди сенга панада.
Ахир менинг қулоғим касал,
Тиқмоқ бўлдинг жиннихонага.
(2005- йил апрель, MDS Лор шифокориАбдунаби Норқўзиевга)
Кўзинг кўрми , Абдунаби лор,
Инсонмисан, борми сенда ҳис.
Ё жонимга қасд қилаганмидинг,
Нега қўйдинг нотўғри ташхис.
ххх
Уйинг куйсин Меҳри хамшира,
Касал бўлиб, мендан аввал ўл.
Қундуз опа буюрди дея,
Нега қилдинг шубҳали укол.
(2005- йил, апрель, Ҳасанов хусусий Отолоринголог клиникаси)
Шайтон йўлдан урганми сени,
Қўлинг синсин, эй Улуғбек лор.
Кўзингни кўр қилган пулмиди,
Нега қилдинг кераксиз укол.
( 2005-йил,13- май, Эски ТошМИ, Лор бўлими)
Касалимдан бўлмайин огоҳ
Соғ жойимга тиғ урди жарроҳ.
Қурбонликка қўй берган эдинг,
Нега мени сўйдилар, Оллоҳ!?
Соғлиқни Сақлаш Вазирлигининг гинекологларга топшириғи
Ўзбек аёлининг алласи ўлсин,
Орзуси, хаваси, ялласи ўлсин.
Иккиқат хотинга заҳар ичиринг,
Ўзбекнинг қорнида боласи ўлсин.
Соғлиқни сақлаш Вазирлигинг нефрологларга топшириғи
Ўзбекнинг касалдан боши чиқмасин,
Йиғласин, кўзидан ёши чиқмасин.
Инқиллаб, синқиллаб юргани яхши,
Ўзбекнинг буйракдан тоши чиқмасин.
Соғлиқни Сақлаш Вазирлигинг ўзбек халқига тилаги
Ҳеч битта ташвишинг битмасдан ўлгин,
Оғзингда луқмангни ютмасдан ўлгин.
Давлатни ортиқча пули йўқ, ўзбек,
Нафақа ёшига етмасдан ўлгин.