Бу дунёда шеърият қолар,
Тугамас ҳеч шоир зурёди.
Мени чексиз ҳайратга солар,
Буюк халқнинг ўлмас ижоди.
Манфур карвонбоши макрига
Чув, тушганча Кунтуғмиш полвон,
Холбекадан айрилганида
Тигдек тилган кўксимни армон.
Алпомиш шум Ёсуман боис
Ўтда ёниб чекканда азоб.
“Ботирга шу қисматми жоиз?!”-
Деб ютганман дарё изтироб.
Болаликдан бери мардликдан
Юрагимда ўқийди ваъзлар
Гўрўғлига муносиб чиққан
Асрандилар –Хасан ,Авазлар.
Битта ота-она қонидан
Бино бўлиб ҳамки,ҳойнаҳой
Жасур асрандилар ёнидан
Кўпларимиз олмаганмиз жой.
Афсонавий Чамбилдек макон
Асли юртда бўлгани тўғри.
Тушларимда от сурар ҳамон
Гўрдан Омон чиққан Гўрўғли.
Асов отдек шиддатга тўлган
Қирқ йигити билан ўша шер
Чамбилини олмоқчи бўлган
Ёв бошида силтайди шамшир.
Ажабланмам болаликка хос
Тасаввурлар ўлмаганига.
Ишонмасдан яшайман ҳануз
Гўрўғлининг бўлмаганига.
Дилга солдим бир ўчмас чўғни
Ким наф пойлар мендек сабрдан.
Бир кун, аниқ, ўша Гўрўғли
Бош кўтариб чиқар қабрдан.
Туроб ЮСУФ.
Жиззах вилояти Пахтакор тумани.