Шўринг қурғур ўзбекларга шу етмай турган эди, бугунги кризис ҳам ўзбек халқининг бошидаги қора кунларини янада оғирлаштирадиган бўлди. Бу дегани Ўзбекистонда мустаққиллик бошланганидан бери мустақилликнинг роҳатини фақатгина
Президент ва унинг тайинлаган ҳокиму тўралари ва олганини уларнинг ювиндихўр тўраваччалари кўрмоқдаларку.
Ўзбекистоннинг қаерига борманг, эркагу аёлларнинг меҳнат қилаётган истаган жабҳангизни олманг у ишчими, деҳқонми,
нафақахўр ёки пенсионерми, барибир улар ўзларининг хақларини вақтида ололмай, ойлаб ҳатто йиллаб, ҳатто судбозлик қилиб сарсону саргардон кишиларнинг борлигини хар қадамда кўрганман.
Шундай амалдорларнинг кичкина бир думчаси давлатнинг ҳамма ташкилоту, муассаса ва корхоналарда биттадан бор бўлиб, у ўзини ўша жамоанинг бошлиғидан кейинги иккинчи амалдордай хечкимни менсимай гуррайиб юради.
Унинг гапини ҳеч ким икки қилолмайди, бу зирапча эса, ўзининг хурмача қилиқ ва таъмагирлиги билан ҳамманинг жонига теккани тегкан..
Унга қанча қўйиладиган талаб ва шикоятларингиз уч пул, негаки кўпинча бундайлар бошлиқнинг бир муттаҳам қулбаччаси ёки юқоридаги бир лавозимдорнинг жияни бўлиб чиқади.
Бундайлар одамлар оладиган пулларини тарқатиши унинг иши ва биринчи вазифасига киришига қарама банкдан олиб келган пулидан то маошингиздан камида ўн фойизини бермагунингизча у сизга не ўйинларни кўрсатмайди дейсиз.
Сизни ака, бошқани ука деб, ширин гаплар билан у хар келганингизда қуруқ жўнатиб банкда пул йўқ, ҳамма ерда кризис, дейди у. Сизни ўйнатиб, ойлар куттириб, ёки кунда қатнаб Дамасда бориш қайтиш харажатга туширади ва қанча тирикчилик учун зарур вақтларингиз куйгач, ундан узр сўраб, бошингизни эгишга мажбур қилдирадиган бу кишининг лавозми бор йўғи кассир, хазиначидир холос.
Бундай маразлик дунёдаги ҳеч бир мамлакатида бунчалик бўлмасада Ўзбекистонда бундай ҳолат шундайгина «мода» ва одатга айланиб кетганки, ҳатто бундай арзимаган нарсаларни ёзишдан ҳам, ийманасан ҳам киши.
Шундай қилиб яна масалан хокимият бўлмасин, ўз ишлайдиган идорангиз бўлмасин биргина варақ қоғозни қоралаш, яъни справкани ўзингизни оссангиз ҳам улардан текинга ололмайсиз, сабабини суриштирсангиз улар уялмай бўзаришиб: нима сиз ўйлайсизки, биз бу ерда бекор ўтирибмизими, яна қоғоз сотиб оламиз, дейишади.
Энг ёмони худди кимдир ўйлаб топган ва бомбадай портлаб, ҳатто бадавлат Америка иқтисодини ҳам таҳликага солиб қўйган кризис, эртасигаёқ Европага учиб, Россия ва Хитойга, бутун дунёга тарқалди.
Ҳамма президентлар гўё кризисдек бундай фалокатнинг олдини олишга киришиб уни қилиш, буни қиламиз деб, миниб юрган ўша эски олиб қочадиган аравадаги сиёсатларини давом эттириш унга янги ғилдираклар қўйиш учун, бунга бюджетдан ўн ва юзлаб миллиардларни ажратишди.
Каримов эса ҳали жим, негаки у ахир аравани бошига урадими, у миллиардларга ҳам муҳтожмас, унинг керак бўлса триллионлари бор. Каримов яна хар куни бир минишида ўнталаб ўқ ўтмас брон ойнали лимузинларни қаторасига қўйиб бирига шляпасини отиб юборса,
иккинчисига сассиқ носкисини ташлаб қўйиб, энди ҳайда дейдиган, мана бундақа президентнинг қандини уриб, даврини сурган ягона президент деса бўлади!
Ахир шунчалар қаҳратонда халққа азоб бериб, уларни қишда исинишга тезак излатдингку, шам ёқдириб қишларини ўтказдирдинг, сенга битта эски
Жигули ҳам ортиқча, шунча лимузинларни ёлғиз бошингга қийнаб нима қиласан, дейоладиган ё бирор қария, ёки депутат-сенатор йўқки, шу Каримов тирик экан экан, улар бундан кейин ҳам Ўзбекистонда топилмаса керак дейман.
Ана тожик президентиниг отасига минг рахмат, у кризисга қарши хақиқий курашиб, ўзининг Ўта Осиё президентларининг ичида ягона хўрози эканлигини исботлади қўйди!
Имомали Раҳмон кризисни йўқотиш учун биласизми нима қилди,
ҳамма амалдорларини йиғиб уларнинг машинасини олиб қўйиб, ишлайман десанг шундай ишла, ишламасанг аризангни ёз, деб уларнинг ҳаммасига биттадан велосипед тарқатди.
Лекин Каримов ҳозирча нималарнидир ундан қизиқроқ қилиб чиқаришга ўйланиб турибди.
У халқи тақдирига туфлаб қўйган бўлсада, ўз обрўси учун 40 эмас, 400 та туянинг пулини аямайдиган одам, ҳа тўғрида унинг асакаси куйибтими, кетса халқнинг пули кетибди.
Аммо кризиснинг уяси бўлиб, уни бошлаган Америкада эса
кризис туфайли бензин ва турли хизматлар дейсизми, машиналар ва айниқса коммунал хизмат, уй-жойлар арзон бўлаётганидан ҳамма хурсанд. Ҳа кечагина кризис тўғрисида гап ҳам йўқ мамлакатларнинг раҳбарларига бўлса, бугун худо бериб қолди,
майдароқ амалдорлардан нега ишларингиз ёмон, хеч қандай натижа йўқ десангиз: улар ака газета ўқиш, телевизор кўриш керак, биз харакат қилаётирмиз, лекин ҳамма ёқни кризис босиб кеттику, деб унинг ясама уҳ тортганини кўрасиз.
Аммо кассирлар маошингиздан энди ўн эмас, 20 фойиз берасиз, ҳамма ёқда кризис, банкамизда бир тийин қолмади, қоқиштириб амаллаб шу сизларнинг пулларингизни олиб келганимга рахмат айтинглар, дейишмайдими улар?
Ҳали «Ф-5» қуш грипи деб, ўтган йили Европада миллионлаб курка ва товуқлар тухуми билан, Англияда эса «оқсил» касали деб, юз минглаб эссиз зотли тоза сигир ва буқаларнинг гўштини ёқиб юборилди.
Бу касалликларни юқмасин деб дунёнинг кўп давлатларига миллиардлаб флакон дорилар пуллаб қолинди! Яна мутахасислар бу касалликнинг вируслари 70 ва 80 градус иссиқдагина ўлади деб айтишганини радио ва телевизорлардан ўз қулоғим билан эшитганман.
Агар бу минглаб тонна гўштларни Ўзбекистонга келтириб беришганда эди, оч халқ уларга рахмат айтиб, майли 100 градусда қайнатиб ўтирмайликда 280 градуслик қозондаги ёғда қовуриб еб юборган бўлар эдик, дейишганди ўзбекистонликлардан кўплари ўшанда.
Хулоса шуки, агар шу Ислом Каримов тирик экан, унинг туфайли таъмагирлик, порахўрлик ва муттаҳамликни бўйинча қилиб илиб олган Ўзбекистонда, харқандай оламшумул содир этилган шов шувлик ҳатто яхши нарсалар бўлганда ҳам халққа наф бўлмай, аксинча улардан ўзбек халқининг «шўрига шўрва» тўкилаверади дейман.
Турлибеков Ёдгор