Менинг исмим Али. Асли озарбайжонликман. Биринчи бор Москвага 1983 йилда, СССР Қуролли кучлари сафида хизмат қилиш учун келганман. Ва шу бўйи Москвада қолиб кетганман. Шу ерда таҳсил олиш учун институтга кирдим. Лекин ташлаб кетдим. Кейин ишлаш учун «Зил» заводига ишга кирдим. Уйландим. Ҳозир иккита болам бор. Бир оғиз сўз билан айтганда онгли ҳаётимнинг асосий қисми Россияда ўтмоқда:
* * *
Ҳозир, агар муболаға бўлмаса, соатига 24 соат ҳайдовчилик билан шуғулланаман. Деярли кўз юммайман. Чунки бензин қимматлашиб кетгани учун жуда кўп ишлашимга тўғри келади. Бусиз болаларимни боқиш қийин. Аёлимнинг миллати рус. Севишиб турмуш қурганмиз. Гапнинг тўғрисини айтсам, ич-ичдан ўзимни озарийдан кўра кўпроқ рус деб ҳис қиламан. Лекин бу мамлакатда мени ҳеч ким рус деб қабул қилмайди.
* * *
Ҳар гал ҳуқуқ-тартибот идоралари ходимлари ва йўл назоратчилари билан тўқнаш келганимда улар менинг «ҳеч ким» эмаслигимга ишора қилишади. Амалдорларга ишингиз тушиб қолган тақдирда ҳам, улар сизни бемалол ҳақорат қилишлари, хўрлашлари мумкин. Шикоятингизга ҳеч ким қулоқ тутмайди. Чунки мен баъзида уларнинг устидан шикоят қилмоқчи бўлиб, лозим муассасаларга қўнғироқ қилганимда, маҳкамага чиқинг деб айтишган. Агар ҳар гал маҳкамага чиқадиган бўлсам, бунга пул қани?! Мен қанча пул топаману ишлаган пулим ҳимоячи ёллаш ва бошқа сарф-харажатларга қандай қилиб етади?! Ҳеч ким додингизга қулоқ тутмайди. Ҳеч ким шикоятингизни эшитмайди. Бу ерда инсон сифатида ҳеч қандай ҳуқуқингиз таъминланмаган. Сизни тўхтатган ҳар қандай милиция ходими паспортингизни йиртиб ташлаши ва «ҳеч ким» эмаслигингизни айтиб, «кўздан йироқроқ жой»га жўнатиб юбориши мумкин. Лекин оддий халқни жуда яхши кўраман, оддий россияликларни ҳурмат қиламан.
* * *
Бошқа томондан, кўнглимни кўтарган нарса – йўловчиларни олиб юрган пайтим уларга Москвани қанчалар яхши билишим хуш келади. Чунки Москвани менчалик яхши билган 10 та инсон бўлса, ўшалардан биттаси менман. Чунки инсон не иш билан шуғулланмасин, ўз ишининг устаси бўлиши керак. Мана, фарзандларим ҳам вояга етишяпти. Масалан, мен уларнинг Россия Қуролли кучлари сафида хизмат қилишларини истайман. Мен уларга қаерда яшашларидан қатъиназар, ўз Ватанларини севишлари лозимлигини айтаман. Мен Россияни ҳар қандай рус фуқаросидан кўра ҳам кўпроқ яхши кўраман.