Халқаро тадқиқотчилар гуруҳининг маълум қилишича, парҳез ва бадантарбияга кўпроқ эътибор қаратиш билан дунёда миллионлаб кишиларни саратон хасталигига чалинишдан асраб қолиш мумкин.
Жаҳон Саратон тадқиқотлари жамғармаси чоп этган ҳисоботга кўра, саратонга чалинмаслик дастурини саноат корхоналари ва хонадонларда жорий этиш керак. Ҳисоботда саратонга чалиниш хавфининг омиллари синчковлик билан кўриб чиқилган.
Энг сўнгги рақамлар шуни кўрсатадики, ҳар йили ўн бир миллион одам саратонга чалинади ва тахминан саккиз миллиони шу касалликдан вафот этади.
Тадқиқотчиларнинг хулосаларига кўра, энг кенг тарқалган саратон турларини парҳез, жисмоний фаолият ва ўз вазнини назорат қилиш орқали даромади энг юқори бўлган мамлакатларда бирдан уч ва даромади паст бўлган давлатларда эса, тўртдан бир қисмга камайтириш мумкин.
Масалан, бу йўл билан Америка ва Британияда инсонлар орасида кенг тарқалган ва аксар ҳолларда фожеий якун топувчи йўғон ичак саратонига чалиниш ҳоллари қирқ фоиздан ортиқроғининг олдини олиш мумкин.
Бразилияда йўғон ичак саратонига чалинган инсонлар сони 37 фоиз ва Хитойда эса, 17 фоизни ташкил этади.
Тадқиқотларда саратон касалликларининг учдан бир қисмига сабаб бўлувчи тамаки чекиш оқибатлари инобатга олинмаган.
Ҳисоботда янграган огоҳларга кўра, инсон умрининг тобора узайиб бораётгани, ўта семизлик ва кам ҳаракатчан ҳаёт тарзи саратон хасталигига чалиниш ҳолларининг ортишига сабаб бўлиши мумкин.
Ҳисоботда бунинг олдини олиш йўллари ҳам таъкидланади, бунинг учун мактабларда ўқувчилар учун соғлом овқатланиш тартибини йўлга қўйиш, одамларнинг машина минишдан кўра, кўпроқ пиёда юришлари, велосипед ҳайдашлари ва озиқ-овқат маҳсулотларининг таркиби аниқ кўрсатилиши лозимлиги айтилади.
Тадқиқотчиларга кўра, ўзларининг хулосалари ҳаммага – ҳукумат раҳбарларидан тортиб, ҳафталик бозор-ўчар қилаётган одамларгача тааллуқли.